Lau t'erdiko Txapelketaren final-zortzirenetako partidua, Lekeition
Final-zortzirenetan Urrutikoetxea eta Victor ariko dira. Binakako partiduetako batean, ostera, Endika Uriondo gizaburuagarra eta Andoni Aretxabaleta markina-xemeindarra ariko dira elkarren kontra.
4 ½ ko Eusko Label Txapelketa atzo aurkeztu zuten. Argazkia: Baiko Pilota. Pilota jaialdia hartuko du Lekeitioko Santi Brouard pilotalekuak domekan [urriak 3], 17:00etatik aurrera. Atzo [irailak 28] Bilboko Bizkaia frontoian aurkeztutako 4 ½ ko Eusko Label Txapelketaren partidu bat ikusteko aukera edukiko dute pilotazaleek. Final-zortzirenetan Urrutikoetxea eta Victor ariko dira.
Sarrerak 20 eurotan ipini dituzte salgai, eta Internet bidez eskuratu daitezke; egunean bertan ere leihatilan erosi ahalko dira.
Bestalde, pilota jaialdia binakako bi partiduk osatuko dute. Horietako batean Lea-Artibaiko bi pilotari ariko dira elkarren kontra. Endika Uriondo gizaburuagarrak Zabalagaz osatuko du bikotea, eta Andoni Aretxabaleta markina-xemeindarraren eta Salaberriaren kontra jokatuko dute. Beste binakako partidua, berriz, Ezkurdia-Bikuña eta Bengoetxea VI-Aranguren bikoteen artekoa izango da.
4 ½ ko Eusko Label Txapelketa. Lau t’erdiko txapelketa bariku honetan [urriak 1] hasiko dute, eta azaroaren 14an jokatuko dute finala Bilboko Bizkaia Frontoian. Atzoko aurkezpenean eman zuten ezagutzera txapelketa lehiatuko duten hamabi pilotarien zerrenda. Baiko Pilotako sei ordezkari eta Aspeko beste sei ahaleginduko dira azaroaren 14ko finalean txapela janzten.
Final-zortzirenen ondoren, final-laurdenetako ligaxka lehiatuko dute, eta gero finalerdiak, kontsolazio finala eta finala jokatuko dituzte. Altuna III, Jaka, Ezkurdia eta Bengoetxea VI izango dira taldeburuak, eta beraz, asteburu honetako lau irabazleek Altuna III.a, Jaka, Ezkurdia eta Bengoetxea VI.a izango dituzte zain final-laurdenetako ligaxkan.
Barikuan Artolak eta Elordik estreinatuko dute txapelketa Mallabian. Zapatuan, Donostiak hartuko du Laso-Peña II bikoteen arteko partidua, eta astelehenean, berriz, Tolosako Beotibarren amaiera emango zaio final-zortzirenetako faseari Elezkano II-P.Etxeberria partiduagaz.
