Kezkatuta daude Debabarrenan, organikoa gutxiago birziklatzen dela erregistratu dutelako
Gaineratu dute iaz baino errefusa gehiago jaso dutela aurten. "2020ko udan 3.410 tona hondakin ez birziklagarri batu ziren, eta aurten 3.458 tona izan dira (%1,41eko igoera)".
Debabarreneko Mankomunitateak esan du uztailean eta abuztuan gaikako bilketa tasak jaitsi egin direla. “Uztailean, abuztuan eta irailean 1.028 tona bio-hondakin jaso dira, 2020an baino 52 tona gutxiago. Hau da, aurten %4,8 hondakin organiko gutxiago jaso dira”. Esan dutenez, joera hori “kezkagarria” izan daiteke denboran gehiago luzatuko balitz. Oro har, gaikako bilketa %51,69 eta %49,41 izan da uztailean eta abuztuan, hurrenez hurren. “Urteko lehenengo zortzi hilabeteetan %54,81koa izan da. Beraz, joera positiboa aldatu egin da”.
Gaineratu dute iaz baino errefusa gehiago jaso dutela aurten. “2020ko udan 3.410 tona hondakin ez birziklagarri batu ziren, eta aurten 3.458 tona izan dira (%1,41eko igoera)”. Azpimarratu dute edukiontzi grisean uzten diren hondakinen %60 baino gehiago hondakin birziklagarriak direla eta edukiontzi marroian utzi behar direla. “Mankomunitatetik herritarrei gogorarazi nahi diegu birziklatzeko ohiturak berreskuratzeko, uda aurretik datuek zuten bilakaera positiboarekin jarraitzeko eta eskualde jasangarriagoa eta ingurumenarekiko mesedegarriagoa izateko”.
Emaitzen aurrean, gogorarazi dute 2030erako gaikako bilketa %70ekoa izateko helburua dagoela ezarrita. “Eskualdea 2030eko helburu horretatik 15 puntura dago. Mankomunitateak lanean dihardu hondakin sortzaile ezberdinei gaikako bilketa errazteko eta gizarteratzeko”. Horrez gain, datozen hilabeteetan hainbat kontzientziazio kanpaina ere egingo dituztela esan dute.
Datuak eskuartean edukita, herritarren inplikazioa “funtsezkoa” dela esan dute. “Eskualdeko pertsona guztiei sortzen ditugun hondakinak dagozkien edukiontzietara botatzeko eskatzen diegu”.
