Markina Shots jaialdiak inoizko jende gehien batu du
Eguenetik zapatura [urriak 14tik 16ra] bitartean ospatu den jaialdiaren arrakasta eta harrera ona azpimarratu dituzte antolatzaileek. Datorren urtekoa prestatzen hasi dira.
Los Tiki Phantoms taldea zapatuko kontzertuan. Argazkia: Markina Shots Pozik daude Markina Shots jaialdiko antolatzaileak. Espero zutena baino erantzun hobea eduki du jaialdiak eta adin guztietako publiko zabala erakartzea lortu du. Hiru egunez luzatu da jaialdia, eguenetik zapatura [urriak 14tik 16ra], eta giroak gora egin du egunez egun.
Eguenean jende gutxi aurkitu zuten kalean Sonic Shakers taldekoek, hala ere, entzuleek kalez kale eskaini zituzten emanaldiak eskertu eta txalotu zituzten. Barikuko swing kontzertuak ere arrakasta handia eduki zuen. Swing musikagaz gainera, dantza ere ekarri zuten Zelaiko agertokira Crazy Jazzers eta Little Harlem Bilboko Swing Eskolak, eta emanaldia gogo onez hartu zuen inguruan batu zen adin guztietako publikoak. Eta zapatuan, txiki geratu zen Kontzekupea, Los Bengala, Los Tiki Phantoms eta The Brontesen kontzertua entzuteko. “Gaztetxoetatik hasi eta hortik gorako jendea kontzertuaz gozatu eta dantzatzera animatu zen, eta sekulako giro ona sortu zen”, azaldu dute.
Sonic Shakers taldea Goiko Portalean jotzen.
Kontzertuen maila goraipatu dute entzuleek, entzuleen harrera ona eskertu dute taldeek eta antolatzaileen lana baloratu dute batzuek zein besteek. “Bai taldeen partetik baita entzuleen partetik balorazio onak jaso ditugu”. Jaialdiko antolatzaileek eskerrak eman nahi izan dizkiote jaialdian parte hartu zuten taldeei eta publikoari “emandako erantzun onagatik”: “Horrelako jaialdi bat antolatzeak lan handia eskatzen du, baina horrelako erantzunagaz merezi duela ikusten dugu. Eskerrak eman nahi dizkiegu guztiei”.
The Brontes taldea Kontzekupean jotzen zapatuan. Argazkia: Markina Shots
Jaialdiak eduki duen arrakasta ikusita, Markina Shotseko antolatzaileak martxan jarri dira jada datorren urtera begira. “Dauzkagun bitartekoekin eta aurrekontuagaz gero eta gaitzago daukagu hobetzen joatea, hala ere horretan saiatuko gara”. Eduki duen harrera ona ikusita, datorren urtean ere swing talde bat ekartzeko asmoa agertu dute esate baterako, baina dantzak ikasteko eskolak eskaintzea ere aurreikusten ari dira. Hori bai, aurreko urteetako formatu handira itzultzea dute asmoa eta Topabeer eta Markina Shots batera egin. Datak ere zehaztu dituzte, datorren urteko hitzordua 2022ko ekainaren 9, 10 eta 11n izango da.
