Planto egin diote ikastetxeetan maskara erabiltzeko derrigortasunari
Besteak beste, Berriatuan, Lekeition eta Ondarroan egin dituzte protestak. Guraso eta umeek 10 minutuko eserialdiak egin dituzte ikastetxeen kanpoaldean. Irakasle batzuk ere protestara gehitu dira.
Lehen Hezkuntzako 6 eta 12 urte bitarteko haurrek jolastokian eta gorputz hezkuntzan ari direnean maskararik ez erabiltzeko aldarrikatzeko mobilizazioak egin dira gaur [urriak 18] Araban, Bizkaian eta Gipuzkoan. Lea-Artibain, esaterako, Ondarroan (Zaldupen, Hondar Ahua guraso elkarteak deituta), Berriatuan eta Lekeition gurasoek eta umeek 10 minutuko eserialdiak egin dituzte ikastetxeen kanpoaldean. Irakasle batzuk ere protestagaz bat egin eta eserialdian parte hartu dute.
Berriatuarrak, protesta egiten.
Ondarroako Zaldupe eskola publikoaren jolastokian egindako protesta. Argazkia: Hondar Ahua guraso elkartea.
Deialdia Haurrak Ere Bai familien sareak egin du. “Ekintza honen helburua da 6-12 urte bitarteko umeek Lehen Hezkuntzan maskarak eramateko derrigortasunari ezetz esatea. Hau da, derrigortasun horri uko egitea. Beraien gurasoak gara, hezitzaileak, eta arduradun gisa ezetz diogu”.
Bestalde, Bizitza Plataformak deituta, hezkuntzan indarrean dauden “protokolo desegokiak” kentzeko eskatzeko ibilaldiak egingo dituzte barikuan [urriak 22] hiriburuetan. Zehaztu dutenez, Hezkuntza Sailen ordezkaritzetara egingo dituzte ibilaldiak. “Haur eta gazteen osasun fisiko eta psikologikoaren aurkako protokoloak kentzeko eskatzeko egingo dira ibilaldiak, adin horretan COVID-19agatik hiltzeko arriskua ‘txertoengatik’ hiltzeko baino askoz txikiagoa delako”.
Gaineratu dute Europako herrialde askotan txertoek sortutako miokarditisengatik Moderna baztertzen ari direla, baina Araban, Bizkaian eta Gipuzkoan “ezer gertatuko ez balitz bezala” jarraitzen dutela diote, “Astrazenekarekin gertatu zen bezala”. Diotenez, ez dute inolaz ere onartzen 5-12 urte bitartekoei “txerto esperimentala” jartzea eta 12 urtetik gorakoek jolastokian maskara erabili beharrik ez edukitzea eta txikiek bai. “Uste dugu jokaera oso zikina dela 5-12 urteko txikiak txerto esperimentala jartzera behartzea, Vaers eta EMA medikamentuen agentzien arabera, txertoak milaka hildako eta bizitza osorako lesioak sorrarazi ditu eta. Txertoa ala maskara, onartuko ez dugun xantaia hutsa da”.
