Xemein eta Beheko Plaza abesbatzek kontzertu bateratua eskainiko dute
Markina-Xemeingo Mertzedeko elizan abestuko dute zapatuan [urriak 23], 20:15ean. Kontzertura joateko ez da aldez aurreko gonbidapenik hartu behar.
Urtero, elkartrukeak egiten ditu Xemein Abesbatzak beste udalerri batzuetako abesbatzekin. Pandemia aurretik Zumaian egon ziren kantuan, orain, berriz, Zumaiako abesbatza dator gonbidatuta Markina-Xemeinera.
Mertzedeko elizan eskainiko dute abesbatza biek kontzertua, zapatuan [urriak 23] 20:15ean. Xemein Abesbatzak zabalduko du kontzertua eta hiru kanta eskainiko dituzte. Zumaiako Beheko Plaza Abesbatzak abestuko du ondoren; lehen zatian korutik abestuko dute, Mari Karmen Azpeitiak organoarekin lagunduta, eta bigarren zatian, berriz, aldare aurrean egingo dute kantuan. Emanaldiagaz amaitzeko, abesti pare bat eskainiko dituzte abesbatza biek batera.
Xemein Abesbatzakoek jakitera eman dutenez, kontzertura joateko ez da aldez aurreko gonbidapenik hartu behar.
Urteurrena. Xemein Abesbatzak 45 urte betetzen ditu aurten, eta horren harira hainbat ekitaldi prestatzen ari dira. Kontzertu hau ere 45. urteurreneko ekitaldien baitan egingo dute. Azaroaren 6rako ere beste emanaldi bat prestatzen ari dira.
