Kanpaina bat hasi dute, pardelak birziklatu egin behar direla aldarrikatzeko
Esan dute larrialdi klimatikoaren garaian ezin dela onartu pixoihalak zabor bihurtzen jarraitzea. Sinadura bilketa bat jarri dute abian Gipuzkoako Ingurumen diputatuak gaiaren inguruan azalpenak emateko.
Mutrikun ipinitako kartelak. “Pardelak eta higiene produktuak zabor bihurtzen ditugun emergentzia klimatikoko garai hauetan, pauso bat aurrera egiteko ordua heldu da”. Esaldi horrekin hasi dute Eguzkikoek pardelak birziklatzeko ordua dela aldarrikatzeko abian jarritako kanpaina. Herritarrak arazo horretaz kontzientziatzeko kartelak ipini dituzte hainbat tokitan, besteak beste, Mutrikun. Sinadura bilketa ere abiarazi dute.
Esan dutenez, Gipuzkoan Birzitek izeneko enpresa bat dago, eta harek pardelak eta higiene produktuak birziklatzen ditu. “Teknologia eta ezagutza baditugu, baita lehengaia ere. Zeren zain gaude?”. Azaldu dute pardelek eta higiene produktuek Gipuzkoan 20.000 tona hondakin suposatzen dutela. “Hondakinak ondo bereiztu eta gero, geratzen den errefusa osoaren %70 mota horretako produktuak dira. Beraz, aurrerapauso hau emateak mundu mailan erreferentzia bat piztea litzateke; geure burua erreferente bezala nabarmentzea”.
Gipuzkoako hainbat herritan produktu horiek bereizita jasotzen direla ere esan dute. Gainera, Gipuzkoako Foru Aldundiaren baitan birziklapenaren Kluster bat dagoela diote. “Kluster hori 2016an sortu zen eta birziklapenarekin lotutako enpresa multzo batek osatzen du; I+G+B sustatzea da euren helburua eta berrerabilpen eta birziklapen ereduak sustatuz, hondakin politiketan eragitea da asmoa”.
Gaiak “berebiziko” garrantzia daukala diote. “Uste dugu Gipuzkoako Hondakinen Kudeaketak bere gain hartu beharko lituzke prozesu horren gidaritza eta exekuzioa. Izan ere, herritar askok hondakinak bereizten dituzte eta haratago joan nahi dute, pardelak ere birziklatuz. Gizartearen eskaera bat da”.
Horren harira, sinadura bilketa bat dago martxan Osoigo plataforman. “500 sinadura lortuz gero Jose Ignacio Asensio Gipuzkoako Ingurumen diputatuak gaiaren inguruko azalpenak publikoki eman beharko lituzke”.
