LAB: "Patronalak kontserba sektorean diharduten emakumeen erabateko prekarietatea betikotu nahi du"
LABek ondokoa proposatu du: sektoreko gutxieneko soldata, epe laburrean, urtean 19.000 euro gordin ingurura iristea eta kontratu mugagabea duten langileen kopurua "nabarmen" handitzea.
Bizkaiko arrain-kontserba eta gazituen sektoreko hitzarmenaren negoziazio mahaiak zazpigarren bilera egin du asteon, eta patronalaren jarrera ikusita, LABek proposamen bat jarri du mahai gainean: “Bizkaiko kontserba-enpresetako langileek jasaten dituzten miseria, soldata arrakala eta behin-behinekotasun tasa handiari aurre egitea”.
Gogoratu dute sektore horretan produkzio kateko langile gehienak emakumeak direla. “Pandemian funtsezko langile izendatu ziren emakumeak, baina, hala ere, prekarietate tasa handieneko sektore batekoak dira. Horretarako azalpen bakarra dago: CEBEK patronalak uste du sektoreko emakumeek ez dituztela gizonen eskubide berdinak izan behar, ez dutela soldata duinik izan behar eta ez dutela merezi lan baldintza duinak dituen lanik”. Sindikatuaren ustez, horien froga dira soldata oso baxuak eta behin-behinekotasun handia: “Esanguratsua da, emakumeak nagusi diren sektorea izan arren, %95ean lan finkoa duten bakarrak gizonak izatea”.
Baldintzak “duintzeko” neurriak. Horregatik, asteon egindako bileran LABek planteamendu bat egin du: sektoreko gutxieneko soldata, epe laburrean, urtean 19.000 euro gordin ingurura iristea –gaur egun ez da 15.000 eurora iristen–, eta kontratu mugagabea duten langileen kopurua “nabarmen” handitzea. “Biak dira prekaritatearen aurka borrokatzeko eta funtsezkotzat jotzen den sektore baten lan eta bizi baldintzak duintzeko neurriak“, azaldu du sindikatuak. “LABen badakigu hori borrokarekin baino ez dela posible izango, eta, horregatik, sektorea aktibatzen eta antolatzen eta sektoreko emakumeek lana eta bizitza duina izan dezaten beharrezkoak diren aliantzak sortzen jardungo dugu”.
Kontserba enpresetako beharginak eta LAB sindikatuko ordezkariak, 2018an Ondarroan egindako protesta batean.
