Bidegorritik igaroko da XVIII. Mutrikuko Herri Krosa
Lasterketa zapatu honetan [urriak 30] izango da 11:00etan. Proban parte hartu nahi dutenek Herrikrosaren web atarian eman dezakete izena aurretiaz.
Korrikan egin eta ikuspegi ikusgarriekin gozatzeko aukera edukiko dute aurten Mutrikuko XVIII. Herri Kroseko parte hartzaileek. Ohi modura, korrikalariek 10 kilometroko ibilbidea osatu beharko dute, Debara joan-etorria eginez. Aurten, baina, aldaketa bat izango du Mutrikuko Talaixa Triatloi Klubak eta Mutrikuko Udalak elkarlanean antolatzen duten kirol probak; errepidetik barik, bide gorritik egingo dute buelta korrikalariek, eta bide batez, Mutrikuko Flysch Beltzaren ikuspegi paregabeaz gozatzeko aukera izango dute.
Zapatuan [urriak 30] egingo da Mutrikuko XVIII. herri Krosa. 11:00etan irtengo dira parte hartzaileak Goiko Plazatik, eta errepidean zehar abiatuko dira Debaraino. Casa Campo inguruan buelta eman eta errepidetik zati txiki bat egin ondoren, bide gorria hartuko dute itzultzeko. Guztien segurtasuna bermatzeko, antolatzaileek oharrak jarri dituzte bidegorrian, herri krosa bertatik igaroko dela esanez, eta pazientzia eskatu eta eskertu diete oinezkoei.
Proban parte hartu nahi dutenek Herrikrosaren web atarian eman dezakete izena aurretiaz. Bihar [urriak 29] da horretarako azken eguna. Hala ere, zapatuan bertan ere izena emateko aukera edukiko dute korrikalariek Goiko Plazan ipiniko duten mahaian. “Bidegorritik itzultzea zoragarria izango da, eta beraz, jendea parte hartzera animatu nahi dugu, batez ere herritarrak”.
[2019ko HERRI KROSEKO ARGAZKIAK IKUSI]
Kros txikiak. Herri krosaz gain, Lehen Hezkuntzako umeentzako probak ere egongo dira zapatu goizean Mutrikun: 600 metroko lasterketa LH 3. eta 4. mailakoentzat eta 1.200 metroko lasterketa LH 5. eta 6. mailakoentzat. 10:15ean hasiko dira probak. Lehenengoek Goiko Plazatik San Mikollako ermitarainoko joan-etorria egin beharko dute, nagusiagoak, berriz, Goiko Plazatik Santa Bataraino joan beharko dira, eta itzuli.
Bi lasterketak neutralizatuta egingo direla azaldu dute antolatzaileek. “Denak batera joango dira korrika, eta korrikalariekin taldeko kide bat joango da. Azken zatian, hark esaten duenean egin ahalko dute korrika nahi duten erritmora ”.
2019ko herri kroseko argazki galeria:
