Yoann Tardivelek Camille Saint-Saensen musika joko du Xemeingo organoan
Bizkaiko Hotsak organo jaialdiaren baitan antolatu dute kontzertua Diego de Amezua Bizkaiko Organoen Lagunak elkarteak eta udalak. 18:00etan hasiko da emanaldia.
Yoann Tardivel Toulousseko Kontserbatorio Erregionaleko organo klase ospetsuko irakaslea. Argazkia: Pablo Cepeda Gutierrez Aurten ere, Diego de Amezua Bizkaiko Organoen Lagunak elkarteak antolatzen duen Bizkaiko Hotsak organo jaialdiaren kontzertu bategaz gozatzeko aukera egongo da Markina-Xemeinen. Oraingoan, Yoann Tardivel Toulousseko Kontserbatorio Erregionaleko organo klase entzutetsuko irakasleak Camille Saint-Saensenen (1835-1921) organorako musika ekarriko du Xemeingo elizara, haren heriotzaren mendeurrenaren ospakizunen baitan.
Pablo Cepeda Gutierrez Bizkaiko hotsak organo jaialdiaren koordinatzaileak azaldu duenez, Tardivelek ekoizpen diskografiko zabala dauka, eta bere azken diskoa Saint-Saensen organorako musikari eskaini dio. Cepedak disko horren dotorezia, aniztasuna eta melodien aberastasuna nabarmendu ditu.
Cepedaren esanetan, Xemeingo organoak are interesgarriagoa egiten du kontzertu hau. Markina-Xemeingo Udalak konpondu berri duen Xemeingo organoa Aquilino Amezua (1847 -1912) euskal organogile ospetsuak eraiki zuen 1910 urtean. “Instrumentu erromantiko honek soinu paleta zabala dauka, banakako kolorez betea eta, aldi berean, osotasunean trinkoa da”.
Kontzertua 18:00etan hasiko da eta sarrera doakoa izango da.
Akilino Amezuak 1910 urtean eraiki zuen Xemeingo organoa. Argazkia: Pablo Cepeda Gutierrez
