Ehunka zapata pare batu dituzte Markina-Xemeinen Grezian dauden errefuxiatuentzat
Bi furgoneta eta atoi bat bete zituzten oinetakoekin. Zaporeak elkarteak datorren astean bidaliko ditu oinetakoak Greziarantz.
Markina-Xemeingo Arkupean oinetakoak batzen. Argazkia: Markina-Xemeingo Ongi Etorri Errefuxiatuak Elkartasuna izan da nagusi berriro ere Markina-Xemeinen. Zaporeak gobernuz kanpoko elkarteak antolatuta oinetako bilketa egin zen zapatuan [azaroak 13] Greziako errefuxiatu esparruetan bizi diren pertsonei eramateko, eta herritarren erantzuna “ikaragarria” izan dela azpimarratu dute bilketan lagundu zuten boluntarioek.
Bi furgoneta eta atoi bat bete zituzten oinetakoz Markina-Xemeinen. Goiz osoan, etenik barik, hurreratzen egon zen jendea Arkupeko bilketa postura, eta ume zein nagusientzako oinetakoak eraman zituzten. Bera Kruz Ikastolan ere egin dute bilketa, eta San Roke egoitzara ere eraman zituzten oinetakoak herritar batzuk.
Oinetako bilketan lagundu zuten boluntario batzuk. Argazkia: Markina-Xemeingo Ongi Etorri Errefuxiatuak
Markina-Xemeingo Ongi Etorri Errefuxiatuak elkarteko kideak eta beste hainbat herritar aritu ziren bilketan laguntzen eta oinetakoak Zaporeak elkartekoei eramateko prestatzen, eta “oso pozik” agertu dira egitasmoak izandako erantzunagaz. “Herri osoak lagundu du”.
Bera Kruz Ikastolan ere batu dituzte oinetakoak.
Oinetakoz betetako gurdia. Argazkia: Markina-Xemeingo Ongi Etorri Errefuxiatuak
Lesbosko errefuxiatu esparruan bizi diren pertsonentzat janaria prestatzen du Zaporeak elkarteak, baina negua datorrela eta beste premia batzuk ere badituztela ikusi dute, oinetakoak besteak beste. Premia horri erantzuteko egin dute bilketa, eta Markina-Xemeinen bezala, Arabako, Bizkaiko eta Gipuzkoako beste 21 herritan batu zituzten oinetakoak. Grezian dauden errefuxiatuei negua hobeto igarotzen lagunduko dieten oinetako horiek datorren astean bidaliko dituzte Greziarantz.
