Etxebarrian jokatuko da domekan Bizkaiko Bertsolari Txapelketako lehenengo finalaurrekoa
Saioaren irabazlea zuzenean sailkatuko da abenduaren 18an Bilboko Bilbao Arenan jokatuko den finalera. Sarrerak Bertsosarrerak atarian daude eskuragai.
Gorka Pagonabarraga Agorria (Durango), Ibon Ajuriagojeaskoa Garmendia (Gernika-Lumo), Imanol Uria Albizuri (Algorta), Miren Amuriza Plaza (Berriz), Onintza Enbeita Maguregi (Muxika) eta Paule Ixiar Loizaga Legarra (Sopela). Argazkia: Bizkaiako Bertsozale Elkartea Bizkaiko Bertsolari Txapelketa finalaurrekoetara ailegatu da, eta domekan [azaroak 21] jokatuko da lehenengoa, Etxebarriko frontoian. Ohiko moduan, 17:00etan hasiko da saioa eta bertan kantatuko duten bertsolariak ondokoak izango dira: Gorka Pagonabarraga Agorria (Durango); Ibon Ajuriagojeaskoa Garmendia (Gernika-Lumo); Imanol Uria Albizuri (Algorta), Miren Amuriza Plaza (Berriz), Onintza Enbeita Maguregi (Muxika) eta Paule Ixiar Loizaga Legarra (Sopela).
Zortziko nagusian, zortziko txikian eta hamarreko txikian ofiziotan hiruna bertso kantatu beharko dituzte bertsolariek. Kartzelako lanean, berriz, puntua emanda bertso bi osatu beharko dituzte zortziko txikian, eta bakarkakoan gai bati buruzko hiru bertso kantatu beharko dituzte doinu eta neurri librean.
Lea-Artibaiko bi egongo dira bertsolarien lana epaitzen Ander Txakartegi Basterretxea berriatuarra eta Graxi Arregi Leonardo markina-xemeindarra. Horiekin batera osatuko dute epaimahaia Joseba Santxo Uriartek, Alaitz Etxanobe Bereziartuak, Ander Arrien Aspiazuk eta Miriam Juaristi Urizarrek. Gai jartzailea, berriz, Zihara Enbeita Gardoki izango da, eta idazkari beharrak, ostera, Itziar Basterretxea Olarreaga ondarrutarrak egingo ditu.
Saioaren irabazlea zuzenean sailkatuko da abenduaren 18an Bilboko Bilbao Arenan jokatuko den finalera eta, besteek, puntuazioaren arabera edukiko dute horretarako aukera.
Etxebarriko finalaurrekora joateko sarrerak eskuragai daude Bertsosarrerak atarian, aurrez hartzea komenigarria dela jakitera eman dute Bizkaiko Bertsozale Elkartekoek.
Etxebarrikoagaz gainera, beste bi finalaurreko jokatuko dira: azaroaren 27an, Galdakaoko Urreta kiroldegian eta abenduaren 4an, Larrabetzuko frontoian. Lea-Artibaiko hiru bertsolari daude finalaurrekoetan. Josune Aramendi Perez markina-xemeindarrak eta Xabat Galletebeitia Abaroa lekeitiarrak Galdakaon kantatuko dute, eta Nerea Ibarzabal Salegik, Larrabetzun.
