Lekeitiora ere ailegatu da suhiltzaileen gela mugikorra
Jolas moduan eta era didaktikoan suteen aurkako segurtasunaren eta norbere babesaren printzipioak ezagutu zituzten ume eta nagusiek.
Suhiltzaileen kamioia ikusi, laneko jantziak frogatu edota euren lanaren inguruan jakiteko aukera eduki zuten ume eta nagusiek domekan [azaroak 14] Lekeition. Bizkaiko suhiltzaileen 50. urteurrenaren ospakizunen barnean antolatu duten gela ibiltaria herriz herri dabil, eta Lekeitioko Independentzia plazara ailegatu zen domeka goizean.
Umeak suhiltzaileen kamioia ezagutzen.
Markina-Xemeingo suhiltzaile etxeko suhiltzaileek parte hartu zuten ekitaldian, Uriosteko (Ortuella) kideen laguntzagaz, eta jolas moduan eta era didaktikoan suteen aurkako segurtasunaren eta norbere babesaren printzipioak azaldu zituzten lehenengo, eta ondoren ginkana batean parte hartu zuten ume eta nagusiek.
Suhiltzaileen ikasgela mugikorra Deriora joango da domekan [azaroak 21] , eta udaberrian oraindik iritsi ez den gainerako eskualdeetara joango dela jakitera eman du Bizkaiko Foru Aldundiak.
