San Andres jaietako kartel lehiaketa antolatu dute Etxebarrian
Lanak aurkezteko azken eguna barikua [azaroak 19] izango da. Lau sari egongo dira.
Badatoz San Andresak eta, beraz, kartel lehiaketa antolatu dute Etxebarrian. Gaia, San Andres jaiak izango dira, eta nahi duten teknika erabili ahalko dute parte hartzaileek. DIN A3 tamainan aurkeztu beharko dira lanak, eta ohartarazi dutenez, lanak ez dira sinatu behar.
Guztira, lau sari egongo dira: 0 eta 5 urte bitartekoentzat, 6 eta 9 urte bitartekoentzat, 10 eta 16 urte bitartekoentzat eta nagusientzat. Azken horiek saria jasotzeko ezinbestekoa izango dute Etxebarrian erroldatuta egotea.
Lehiaketan parte hartu nahi dutenek, barikua [azaroak 19] izango dute lanak aurkezteko azken eguna. Kartelak udaletxean entregatu behar dira, bulegoko ordutegian (09:00etatik 14:00etara).
Bestalde, lanak egin ahal izateko, ekitaldi berezia antolatu zuen zapatuan [azaroak 13] guraso elkarteak; kartelak egiteko aukera egon zen jantokian, 16:30etik 19:00etara.
