22. Korrika martxoaren 31tik apirilaren 10era egingo da
Amurrion (Araba) hasi eta Donostian amaituko da euskararen aldeko lasterketa. Hitza eta ekintza berbak uztartuta 'Hitzekin' izango da aukeratu duten leloa. Pirritx, Porrotx eta Mari Motots pailazoak omenduko ditu egitasmoak, "azken urteetako konpromisoagatik eta ekinagatik".
Korrika 2022an egin egingo dela esana zuen AEK-k, eta nondik nora egingo duten ere jakinarazi du gaur [azaroak 17]. Amurrion (Araba) hasiko da martxoaren 31n, eta Donostiara iritsiko da apirilaren 10ean. Pare bat hilabete barru zabalduko dute antolatzaileek egitasmoaren xehetasun gehiago eta ibilbide osoa.
Aurtengo leloa Hitzekin izango dela jakitera eman dute, Hitza eta ekintza uztartuta, “euskara HITZetik EKINtzetara eramateko unea delako»: “Hizkuntza bat hitzekin osatzen da baina ekimenek eraikitzen dute hizkuntza baten komunitatea Euskarak aurrera egin nahi badu, euskaldun (pro)aktiboak behar ditu, konbentzimendutik ekintzara, praktikara, jauzi egingo dutenak”.
Larrialdi linguistikoaren “alarma gorriak pizten” ari direla esan dute, eta “ekiteko” eskatu dute antolatzaileek, bai herritarrei eta baita erakundeei ere. “Jendartearen nahiei eta beharrei erantzuteko ezinbestekoa da partida hau irabaztea. 22. korrikara batzeko unea da, eginez eragingo dugu eta eragin araziko diogu elkarri. Hitzarekin eta ekinarekin. Hitzekin ulertzen dugu hizkuntza eta orain da 22.tantoa egiteko unea, partida irabazi behar da gantxoz zein paretaz zein botez, ekin eragin eta eginarazi, ekin korrikari”.
Bestalde, 22. Korrikak Pirritx, Porrotx eta Mari Motots omenduko ditu, azken urteetako konpromisoagatik eta ekinagatik. “1987ko sortu zen eta gaur egun Euskal Herriko pailazorik arrakastatsuenak dira. 24 urteko ibilbidea egin dute euskara munduan, eta zuzeneko eragina izan dute ume eta guraso askok euskararen hautua egin dezaten”.
