'Emakumeak' diziplina anitzeko ikuskizuna eskainiko dute Markina-Xemeinen
El Salvadorren abortu delitua egotzita espetxeratu dituzten emakumeak gogoratu eta omentzeko sortu den proiektua da 'Emakumeak'. Azaroaren 25aren harira antolatu dute.
Azaroaren 25ean den Emakumeen Kontrako Indarkeriaren Aurkako Nazioarteko Egunaren harira Emakumeak diziplina anitzeko ikuskizuna ekarri dute Markina-Xemeinera Markina-Xemeingo Udalak eta Uhagon Kulturguneak. El Salvadorren abortu delitua egotzita espetxeratu dituzten emakumeak gogoratu eta omentzeko sortu den proiektua da Emakumeak, eta Emakume guztion historia dokumentalak, Emakume guztiok eleberri grafikoak eta Emakumeak dantza piezak osatzen dute ikuskizuna.
Hasteko, umetxoak galdu ondoren abortatzea egotzita kartzelan egon ziren hiru emakume salvadortarri buruzko dokumentala proiektatuko dute. Mundubat gobernuz kanpoko erakundeak ekoitzi eta Itxaso Diazek zuzendutako dokumentala gaztelaniaz izango da, euskarazko azpitituluekin. Ondoren, Emakume guztiok eleberri grafikoaren aurkezpena egingo du Higinia Garai ilustratzaileak, eta amaitzeko, Emakumeak dantza garaikide pieza eskainiko du Node konpainiak.
Hiru emanaldiak zuzenean eskainiko dituzte Uni frontoian domekan [azaroak 21]. Hitzordua 18:00etan izango da, eta sarrerak udaletxeko kutxazainean eskuratu behar dira. Sarrerak 6 euro balio ditu, Uhagoneko bazkideek, berriz, 4 eurotan izango dituzte.
Tailerra. Dantza garaikideko ikuskizunagaz lotuta, dantza tailerra ere emango dute Uhagon kulturgunean zapatuan [azaroak 20]. Bi ordu eta erdiko tailerra izango da, 10:00etatik 12:30era, eta tailerraren gidariak Myriam Perez Cazabon koreografoa eta sortzailea eta Ion Estala Node konpainiako zuzendaria eta sortzailea izango dira. Tailerrean parte hartu nahi dutenek 94-616 63 03 telefono zenbakira deitu behar dute.
