Errigorak 15.500 saski banatu eta euskalgintzara 235.000 euro bideratuko ditu
Errigorako arduradunek esker ona agertu eta jasotako erantzunarekin "pozarren" daudela esan dute. "Auzolanaren balioa eta baliagarritasuna frogatu ditugu".
Errigorako kideak, kanpainaren amaiera ekitaldian. Argazkia: Errigora “Zorionak bihotz-bihotzez kanpaina hau posible egin dugun guztioi”. Esaldi horrekin hasi du Errigorak aurtengo udazkeneko kanpainaren balorazioa. Guztira 15.500 saski banatuko dituzte eta, ondorioz, 235.000 euro bideratuko ditu Nafarroa Hegoaldeko euskalgintzara.
Datuak emateaz batera, auzolanaren garrantzia azpimarratu dute. “Harrotasunez betetzen gaitu herrilan ariketa erraldoi honek. Errigoraren ibilbidea herriak herriari egindako ekarpenaren ibilbidea da. Herritarrak kontsumitzaile edo erabiltzaile huts bihurtu diren garaiotan, auzolanaren balioa eta baliagarritasuna frogatu ditugu”.
Dena dela, esan dute iazko datuak ez direla gainditu. “Iaz, salbuespeneko egoera batean geundela, pandemiak euskalgintzari emandako zartakoari erantzuteko elkartasun uholdea galdegin genuen eta inoizko atxikimendu handiena eduki zuen kanpainak. Zaila zirudien, beraz, aurtengoan tamainako erantzuna jasotzea”. Baina iazkoaren ostean, esan dute inoiz banatu den saski kopuru handiena dela aurtengoa.
Azpimarratu dute zortzi urtean Nafarroa Hegoaldeko euskalgintzara 1,6 milioi euro bideratu direla.
