Lekeitioko parrokiara helduko da Bizkaia Kantuan abesbatzen kontzertu zikloa
Bilboko Koral Elkarteko Euskeria gazteen koruak, Lekeitioko Kantakai Koralak eta Markina-Xemeingo Emeki Koralak abestuko dute. Kontzertua zapatuan [azaroak 20] izango da, 20:00etan.
Zapatuan [azaroak 20] eskainiko dute Lekeition Bizkaia Kantuan abesbatza zikloko azken kontzertua. Bilboko Koral Elkarteak, Bizkaiko Abesbatzen Elkarteak eta Bizkaiko Foru Aldundiak antolatutako kontzertu zikloaren helburua pandemia dela-eta denbora luzean isilik egon diren abesbatzen jarduera berrabiazi eta haien artean harremanak sortzea da, eta Gorlizetik eta Basauritik igaro ondoren, Lekeitiora ailegatuko da ekimena.
Bilboko Koral Elkarteko Euskeria gazteen koruak, Lekeitioko Kantakai Koralak eta Markina-Xemeingo Emeki Koralak abestuko dute zikloaren baitan. Kontzertua 20:00etan izango da Santa Maria parrokian, eta sarrera doakoa izango da, edukiera bete arte. Abesbatza bakoitzak 15 minutuko errepertorioa eskainiko du, eta amaieran, guztiek batera, Lore Roucok beren beregi kontzertu ziklorako konposatu duen Bizkaia Kantuan ereserkia kantatuko dute.
Lekeitioko Kantakai Koralarentzat konfinamenduaren ondoren kalean emango duen lehenengo kontzertua izango da zapatukoa, eta Oihana Etxabe zuzendariak azaldu duenez “ilusio handiz” daude. Bost kanta abestuko dituzte. “Aurreko urtean ikasitako obra batzuk eta oraindik plazaratu gabe ditugunak”, zehaztu du Etxabek. Aurreratu duenez, euskal kantu tradizionalak, japoniar bat eta Izaroren bat aukeratu dituzte errepertoriorako. “Abestietako bi pianoagaz lagunduta kantatuko ditugu, eta besteak A Capella”.
Markina-Xemeingo Emeki Koralak ere askotariko errepertorioa eramango du, Yolanda Loira zuzendariak azaldu duenez. Kantu erlijiosoak, euskal folklorea eta atzerriko kanta bat ere bai. Alba Idoiagabeitiak pianoagaz eta Unai Gallastegik perkusioagaz lagunduko ditu hiru kantutan. Horrez gain, beste hiru kanta abestuko dituzte A Capella. “Beti egiten dut ahalegina emakume musikarien kantak sartzeko, horien lana ezagutzera eman asmoz”, azaldu du Loirak. Eta, oraingoan, Junkal Guerrero, Eva Ugalde eta Mary Lynn Lightfoot musika egileen lanak aukeratu ditu Bizkaia Kantuan kontzerturako.
