Alex Camposek irabazi du Iruzubietan jokatu den Lehendakari Txapelketa
Boni Plaza MX3T taldeko markina-xemeindarra bigarren geratu da. Euskal Herriko Hiru Txirlo Bola Joko Txapelketako lehenengo 64 sailkatuek parte hartu zuten norgehiagokan.
Alex Campos, Boni Plaza eta Olaitz Rodriguez lehen hirurak Iruzubietako tiraldiaren ostean. Argazkia: Mikel Urkia Zuloaga Iruzubietako bolatokian lehiatu zuten zapatuan [azaroak 20] Euskal Herriko Hiru Txirlo Lehendakari Txapelketaren kanporaketa, eta Eibarko Asola Berri elkarteko Alex Campos izan zen irabazlea. Euskal Herriko Txapelketako lehenengo 64 sailkatuek parte hartu zuten norgehiagokan, eta kanporaketa formatuan jokatu zen, lehenengoa azkenaren kontra eta bigarrena azken aurrekoaren kontra eta horrela, irabazle bakarra.
Lehendakari Txapelketako bigarrena MX3T taldeko Boni Plaza markina-xemeindarra izan zen, eta hirugarren sailkatua, Bergaran bizi den Olaitz Rodriguez eibartarra eta Asola Berri elkartekoa.
Iruzubietako bolatokian txapelketa jokatzen. Argazkia: Mikel Urkia Zuloaga
Mikel Urkia Zuloaga Euskal Herriko hiru txirlo bola joko modalitatearen lehendakariak emakumeek lehenengoko postuetan hartu duten presentzia azpimarratu nahi izan du: “gaur egun esan ahal dugu Hiru Txirlo Bola Joko modalitatean berdintasuna lortu dugula”. Izan ere, Aitziber Olaizola bolari elgoibartarrak irabazi du 31. Euskal Herriko Bola Joko Txapelketa, eta Lehendakari Txapelketan ere aurrean ibili dira emakume bolariak.
