Leire Etxanizek pilota goxoko finalerako txartela lortu du
Abenduaren 4an Abadiñon jokatuko diren finaletan egongo da Etxebarriko pilotaria. Etxanizek nagusitasun osoz irabazi zion Maria Escuderori zapatuan [azaroak 20] jokatu zuten finalaurrekoa.
Emakume Master Cupeko lau eta erdiko Pilota Goxoko finaleko lehen txartelak banatu ziren zapatuan [azaroak 20] Balmasedan, eta nagusien mailan Leire Etxaniz Etxebarriko pilotaria izan zen abenduaren 4an Abadiñon jokatuko diren finaletarako lehen sailkatua. Etxanizek nagusitasun osoz irabazi zion Maria Escuderori; 18-1 gailendu zen etxebarritarra. Senior mailagaz gainera, hastapen mailako txapelketa ere jokatu zen. Hastapen mailan Eider Zubizarretak lortu zuen sailkapena. Zubizarretak 8-18 irabazi zion Alaia Uriarteri.
Pilota Goxuko Txapelketa oso erraza egiten ari zaio etxebarritarrari. Azaldu duenez, pilotari gehienak txapelketa mistoa jokatzen ari dira gaur egun, eta goxuan hasiberriak dabiltza gehiago. Hala ere, esku pilotan jarraituz gero, goxuagaz aurrera egingo duela azaldu du: “Mistoan jokatzeko gogor entrenatu behar da, eta lanarekin oso zaila egiten zait. Beraz, nahiago dut goxuagaz jarraitu eta pilotaz gozatu”.
Denboran egon da Etxaniz esku pilotan jokatu barik. Palan aritu da, eta orain ere hirugarren mailan jokatzen ari da gizonezkoekin. “Pilota Goxuko Txapelketan jokatzeko izena eman nuen, baina pare bat bidar bakarrik entrenatu ahal izan dut”. Prestatzeko denbora nahikorik eduki ez badu ere, bere mailak eta beteranotasunak finaleraino eraman dute.
Barikuan [azaroak 26] jokatuko da Pilota Goxuko bigarren finalaurrekoa Urduñan Nagore Aramendi eta Ania Oronozen artean. Horietako bat izango da Etxanizen aurkaria finalean.
Leire Etxaniz eta Maria Escudero. Argazkia: Emakume Master Cup
Mistoa. Pilota Goxuko partidez gain, pilota mistoko final laurdenetako beste bi partida ere jokatu ziren zapatuan, eta bertan Enara Gaminde eta Amaia Aldai izan ziren finalerdietarako jauzia eman zutenak. Lehen partidan, Enara Gamindek ez zuen arazo handirik eduki Andrea Capellani 18-2 irabazteko. Bigarren partidan, 18-15 irabazi zion Aldaik Leire Garairi.
