Ikusgarri aretotik jarraitu ahalko da 'Gaualdia'. Bihar [azaroak 27], berriz, zinemagintzako profesionalen topaketa egongo da goizean, eta sari banaketagaz itxiko dute jaialdia arratsaldean, Ikusgarri aretoan.
Lekeitioko Euskal Zine Bilera azken txanpan sartu da. Zapatuan [azaroak 27] banatuko dituzte lehiaketako sail ofizialeko lanen sariak Ikusgarri aretoan, Ana Goitia eta Aitor Abaroak aurkeztuta 19:00etan hasiko den itxiera ekitaldian. Horrez gain, euskal animazioa bultzatu eta zinemazale berriak sortzeko lanean aitzindari izan diren Baleuko eta Dibulitoon Studio ekoiztetxeak ere omenduko dituzte.
Horren guztiorren aurretik, baina, Lekeitioko 44. jaialdiko azken ekitaldiez gozatu ahal izango da. Gaur [azaroak 26], 21:00etan, esate baterako, Euskal Zine Bilera zuzenean konektatuko da Hazparneko Zinegin jaialdiagaz. 10. Zinegin euskal zinemaldia atzo [azaroak 25] hasi zen eta domekara [azaroak 28] arte iraungo du, eta, gaur, jaialdi biek bat egin eta elkarlanean antolatutako Gaualdia eskainiko dute.
Hasteko, Non dago Mikel? filma proiektatuko dute aldi berean, eta ondoren, Hazparnetik zuzenean Kristof Arotsarenak gidatutako solasaldian parte hartuko du Lekeitioko jaialdiak. Amaia Merino zuzendariagaz eta senide bategaz solasaldia egingo dute Hazparnen. Zinegin jaialdia ezagutzeko aukera ere egongo da Euskal Zine Bilerak zuzeneko elkarrizketa bat egingo die-eta Zinegineko arduradunei.
Ikusgarri aretotik jarraitu ahalko da Zinegin jaialdiagaz batera egingo den Gaualdia. Sarrerak euro 2 balio ditu, eta Lekeitioko kultur etxean edo Ikusgarri aretoan bertan eskuratu daitezke.
Animaziozko filmak. Aurreko egunetan legez, gaur ere Ikusgarri aretotik eta Euskal Zine Bileraren webgunearen bidez ikusi ahalko dira euskal animaziozko filmak, Animadebaren eskutik. Koldo Almandozen Hubert Lemonen azken hegaldia (10’), Aitor Oñederraren I said I would Never Talk About Politics (11’), Bego Vicarioren Jane, Tarzan ez zen horren guay (3’23”) eta Hauazkena taldearen Beti bezperako koplak (6’) filmak emango dituzte.
Bestalde, zapatuan 12:00etan, (H)emen Gaude atalean, Olatz Beobidek gidatutako Topaketa Profesionala egongo da kultur etxeko Azkue aretoan. Pelikulen banaketari buruz ariko dira Graxi Irigai EHUko ikerkerlaria eta Gastibeltzako kidea, Joahana Olabarria Euskaltzaleen Topaguneko kidea eta Maria Jesus Diez Sota Barton Filmsekoa.
