Silitiak irabazi du 30. Gaztea Maketa Lehiaketa
Silitia taldea osatzen duten Xabier Barrutia bilbotarrak eta Ibai Silicato lekeitiarrak izebari 'Zorionak zuri' abestuz ospatu zuten garaipena. 5.000 euroko saria eta Bilbao BBK Liven jotzeko aukera izango dute.
Atzo [azaroak 25] lehiatu zen Bilboko Kafe Antzokian, Gaztea irrati katearen 30. Maketa Lehiaketaren finala. Mirua, Sara Azurza, Udda eta Silitia taldea zeuden finalean, eta sari nagusia Xabier Barrutia (gitarrak, baxua, bateria eta teklatua) bilbotarrak eta Ibai Silicato (ahotsa eta perkusioa) lekeitiarrak osatzen duten Silitia taldeak eraman zuen. 5.000 euroko saria eskuratu dute, eta Bilbao BBK Liven jotzeko aukera ere izango du talde bizkaitarrak.
Izaro Andresek, Julen Idigorasek eta Josu Billelabeitiak osatutako epaimahaiak hartu zuen erabakia ordu erdiko eztabaidaren ostean, eta Xabier Doncel Gazteako zuzendariaren eskutik jaso zuen bikote bizkaitarrak saria. Modu berezian ospatu zuten, Ibai Silikatoren izebari Zorionak zuri abesten.
Beste sari biak Udda eta Mirua taldeentzat izan ziren. Udda gasteiztarrak Entzuleen Saria eraman zuen, eta aurtengo garaikur berezia, Harrobia Saria, Mirua hirukote tolosarrarentzat izan zen. Udda taldeak 2.500 euroko Gazte BizHitza saria jaso zuen, eta Mirua taldeak lau abestiko EP bat grabatzeko aukera izango du.
Datozen egunetan, ekitaldi osoa ikusgai egongo da Gaztearen webgunean eta Youtubeko kanalean.
