Iñigito Txapelpunkek 'Iratxoen Kantu Sekretuak' lan berria egin du
Alde batetik, musikari lekeitiarrak zortzi abesti argitaratu ditu USB formatuan, eta izen bereko ikuskizuna ere sortu du. Aurkezpena abenduaren 6an egingo du, Durangoko Azokan.
Euskal Herri Magikoa bildumaren baitan, natura eta oro har, ingurumena jasaten ari den kalteei aurre egiteko mezuak dakartzate musikari lekeitiarrak argitaratu berri dituen zortzi abestiek; Iratxoen Kantu Sekretuak izena jarri dio lanari. Abestiak Mendexakua estudioetan grabatu ditu Iñigitok, eta hainbat abestitan Oihane Eskurzak parte hartu du.
Iratxoen laguntzagaz, ingurumenaz, bizitzaz eta kolorez betetako planeta batez gozatu nahi duela aldarrikatzen du Iñigitok. “Pertsona oro kontzientziatzeko eta sentsibilizatzeko balio dute abestiek”, dio lekeitiarrak.
Iratxoen Kantu Sekretuak, baina, ez da abestiz hornitutako lana bakarrik. Izan ere, ikuskizuna ere bada, eta hori Durangoko Azokako Landako gunean aurkeztuko du astelehenean [abenduak 6], 19:00etan. “Ikuskizunak iratxoak eta pertsonak ikuskizun magikoan batzen ditu: jolasak, hitz magikoak, musika, dantza eta abar uztartzen ditu”. Gainera, ikuskizunaren amaiera ere aurreratu du: “Ikuskizuna ‘Helduak ez izan txarrak’ esaldiagaz amaituko da”.
