Urkullu: "Ziurtagiria erabili ahal den espazio guztietan erabiltzea da gure helburua"
Momentuz, zapatutik aurrera [abenduak 4] ziurtagiria beharko dute herritarrek aisialdirako jarduerak eta dantzarako aukerak eskaintzen dieten lekuetan eta 50 pertsonak baino gehiagok jateko lekua duten jatetxeetan. Ziurtagiria beste leku gehiagotan eskatzeko baimena EAEko Auzitegi Nagusiak eman behar diela esan du.
Eusko Jaurlaritzak eskatu bezala, zapatutik aurrera [abenduak 4] COVID ziurtagiria beharko dute herritarrek aisialdirako jarduerak eta dantzarako aukerak eskaintzen dieten lekuetan, hala nola dantzalekuetan, musika ikuskizunak eskaintzen dituzten aretoetan, musika tabernetan eta karaokeetan. III. taldean sartutako pub eta taberna berezietan ere eskatu nahi dute ziurtagiria, 22:00etatik aurrera.
Jatetxeei ere eragingo die neurriak: 50 pertsonak baino gehiagok jateko lekua dutenetan eskatu beharko dute. Araba, Bizkai eta Gipuzkoan azken 14 egunetako 100.000 biztanleko intzidentzia metatua 150 kasukoa baino handiagoa den bitartean eutsi nahi diote neurriari (811koa zen atzo EAEn). Establezimenduen jabeen ardura izango da bezeroek dokumentua badutela ziurtatzea, eta paperean edo formatu digitalean aurkezteko aukera egongo da.
Herritarrei zuhurtziaz jarduteko eta ahalegina egiteko eskatu die Lehendakariak. “Indarrean dauden neurriak eta neurri berriak bete behar ditugu”
Eusko Jaurlaritzak, gainera, beste leku batzuetan ere exijitzea aztertuko du. “Erabili ahal den espazio guztietan erabiltzea da gure helburua, herritarrak txertatzeko eta arriskutik babesteko”, esan du Iñigo Urkullu lehendakariak. Zehaztu du, besteak beste, espazio itxietan eskatuko dutela, batik bat, publikoa zutik badago. Baita gimnasioetan edo kirol jarduera egiten den beste espazio batzuetan, eta ostalaritzako beste esparru batzuetan. Azkenik, ospitaletara edo zahar egoitzetara bisitan joateko ere exijitu nahi dutela adierazi du.
Horretarako, baina, Urkulluk onartu duenez, EAEko Auzitegi Nagusiari eskatu beharko diote baimena. “Larrialdi egoera hau aurrekoengandik desberdina da, eta hartu beharreko neurriak ere desberdinak izango dira”.
Gizarteari oharra. Oro har, herritarrei zuhurtziaz jarduteko eta ahalegina egiteko eskatu die Lehendakariak. “Indarrean dauden neurriak eta neurri berriak bete behar ditugu. Beharrezkoa da norberaren babeserako neurri guztiak betetzea. Hau ez da amaitu. Birusak gure artean jarraitzen du, eta birusa oso hilkorra da. Txertoa oso lagungarria da, baina txertoa jarrita ere kutsatu egin gaitezke. Jarrai dezagun prebentzio neurriak betetzen. Denon zuhurtzia eta ahalegina ezinbestekoak dira”.
