Leire Etxanizek Master Cupeko lau t'erdiko txapela jantzi du berriro
Zapatuan [abenduak 4] lortutakoa Emakume Master Cup-eko lau t 'erdikoan lortzen duen hirugarren txapela izan da. Nagusitasun osoz irabazi zion Iparraldeko Ana Oronozi.
Zapatuan [abenduak 4] jokatu zuen etxebarritarrak Master Cup Txapelketako Pilota Goxoko finala Matienako pilotalekuan, eta nagusitasun osoz gailendu zen. 22-5 irabazi zion Iparraldeko Ana Oronoz pilotariari.
Tanto gogorrak egon zirela azaldu du Etxanizek, baina Oronoz zendu berria den Panpi Ladutxeren ikaslea izan dela gogoratu du, eta partidura “mentalki txarto” heldu zela azpimarratu du. Etxebarritarrak, berriz, bere ohiko jokoa erakutsi zuen; partida osoan agindu zuen, tantoak nahi bezala hasi eta amaituz. “Sasoiko aurkitu naiz txapelketa osoan, eta partida denak ondo jokatuta irabazi ditut”.
Zapatukoa Emakume Master Cup-eko lau t ‘erdikoan lortzen duen hirugarren txapela izan da. Zapatukoa kontuan hartuta, Etxebarriko pilotariak sei txapel lortu ditu denetara Emakume Master Cup txapelketan, hiru lau t’erdikoan eta beste hiru binaka, hala ere, txapelak “ilusioa” egiten diola aipatu du.
Beste final bi. Lehen mailako finalagaz gainera, Hastapeneko pilota goxoko finala eta pilota mistoko promesena ere jokatu ziren Matienan. Hastapeneko pilota goxoko finalarekin hasi zen jaialdia, eta bertan Eider Zubizarreta zarauztarrak eta Lide Lopez ataundarrak neurtuko zituzten indarrak. Zubizarreta hobeto aritu zen eta 18-4 irabazi zion Lopezi. Alde handiko garaipena eskuratu zuen baita ere Maddi Barrokal bergararrak pilota mistoko promesen norgehiagokan. 22-6 irabazi zion Ainhoa Romero lemoarrari.
