Pantalan berriak jartzen hasiko dira Lekeition
Lekeitioko Udalak azaldu duenez, erabiltzaileen segurtasuna hobetu eta txalupa gehiago sartzeko aukera ekarriko dute lanek.
Hilabete honetan hasiko dira Lekeitioko portuko pantalan berriak eraikitzeko lanak. Antolaketa berriaren bidez erabiltzaileek “euren txalupetara heltzeko erraztasun handiagoa” edukiko dutela jakitera eman du Lekeitioko Udalak, “segurtasuna handitu eta zerbitzuak ere gehituko zaizkie”. Gainera, ontzi gehiagorentzako lekua egongo da; pantalan berriek 279 ontzientzarako lekua edukiko dute, gaur egun daudenak baino 20 gehiago izango dira.
Lanek gehienez 6 hilabete iraungo dutela azaldu du udalak, hala ere, aurretik amaitzea espero dute. Horretarako portua hustu egin behar dela jakinarazi dute. “Epe horiek betetzeko erabiltzaileen kolaborazioa ezinbestekoa da. Txalupa guztiak abenduaren 25a aurretik portutik atera behar dira”.
Obra hauek 1.930.852,30 euroko kostua izango dute eta Euskadiko Kirol Portuak erakunde publikoak finantzatuko ditu. Obraren ardura, berriz, Astillerros Amilibia S.L.-k izango duela jakitera eman dute. Portuko erabiltzaileek informazio gehiago jaso ahal izateko helbide elektroniko bat ere jarri dute martxan: lekeitio1@ekpsa.eus. Helbide horren bidez Leakai elkarterekin jarriko dira harremanetan.
Urteetako eskaera. Hainbat urtez herriko eragileek egindako eskaerari erantzuten diete lanek, eta portuko erabiltzaile guztiei eragiten dietenez, erakundeak zein portuko erabiltzaileak elkarlanean aritu dira zer-nolako moldaketak egin erabakitzeko. Horrela, Eusko Jaurlaritza, Lekeitioko Udala, Antzar komisioa, Leakai, San Pedro Kofradia eta Isuntza arraun elkartea lanean aritu dira portuko erabiltzaileentzako irisgarritasuna, segurtasuna eta zerbitzuaren kalitatea hobetzeko asmoz. Eta, zehaztu dutenez, proiektu berri honek arrantza tradizionala, aisialdiko nautika, antzar eguna eta arraun taldearen beharrizanak barneratzen ditu, eta portuan txalupak edo motor txikiak dituzten erabiltzaileentzako zerbitzurik onena izatea bilatzen da.
