Munitibarko Udala auzo batzarrak egiten hasiko da asteon
Zapatuan [abenduak 11] egingo dute lehenengo batzarra. Lehen egun horretan Gerrikaitzekoekin eta Ganbekoekin elkartuko dira.
Pandemiaren ondorioz iaz etenaldia egin ondoren, aurten berriro herritarrekin auzorik auzo batzeari ekingo dio Munitibarko Udalak. Zehaztu dute sei auzo batzar egingo dituztela, eta zapatuan [abenduak 11] izango da lehenengoa.
10:00etan Gerrikaitzeko bizilagunekin elkartuko dira udal arduradunak, Bengolan, eta 12:00etatik aurrera, Ganbe auzokoekin egongo dira, eskolan.
Lekuan lekuko kezkak, arazoak eta proposamenak entzun gura dituzte, eta era berean, udalaren jardunari buruzko infromazioa emango dute. “2021eko erronda abenduan eta urtarrilean egingo da. Leku bakoitzean bertan dauden arazoez berba egiteko eta udalari buruzko informazio orokorra emateko izango dira batzarrak”, azaldu dute.
Abenduaren 18an Totorikakoen, Gerrikakoen eta Urionakoen txanda izango da. Totorikako auzotarrekin 10:00etan batuko dira frontoi ondoan. Gerrika eta Urionako bizilagunak, ostera, Santa Luzia ermitara bertaratu beharko dira, 12:00etarako.
Urtarrilaren 15erako deitu dituzte azkenengo bi auzo batzarrak. Egun horretarako 10:00etan Aldakako Santiago ermitan ipini dute hitzordua. 12:00etatik aurrera, berriz, Berreñoko bizilagunekin bilduko dira, autobus geltokian.
Azpimarratu dute aurreikusitako sei auzo batzar horien bidez, udalaren kudeaketa “hurragokoa” egitea eta auzoekin hartu-emana sendotzea dutela helburu.
AUZO BATZARRAK:
- ABENDUAK 11:
- 10:00. Gerrikaitzeko bizilagunekin, Bengolan.
- 12:00. Ganbeko bizilagunekin, Eskolan.
- ABENDUAK 18
- 10:00. Totorikako bizilagunekin, frontoi ondoan.
- 12:00. Gerrikako eta Urionako bizilagunekin, Santa Luzia ermitan.
- 10:00. Totorikako bizilagunekin, frontoi ondoan.
- URTARRILAK 15
- 10:00. Aldakako bizilagunekin, Santiago ermitan.
- 12:00. Berreñoko bizilagunekin, autobus geltokian.
- 10:00. Aldakako bizilagunekin, Santiago ermitan.
