Martxan dago Markina-Xemeingo Gabonetako argazki lehiaketa
'Piztu dendak, piztu Markina-Xemein' izango da lehiaketaren gaia. Abenduaren 19a izango da parte hartzeko azken eguna.
Markina-Xemeingo Udalak eta Hemen be bai herriko merkatarien elkarteak Piztu Dendak Gabonetako argazki lehiaketa antolatu dute aurten ere. Piztu dendak, piztu Markina-Xemein izango da lehiaketaren gaia, eta abenduaren 19a izango da parte hartzeko azken eguna.
Ohi modura, parte hartu nahi dutenek gaiagaz lotutako argazkia atera eta Facebook edo Instagram sare sozialetara igo behar dute #piztudendak2021 traola erabilita. Hiru argazki onenek Hemen Be Bai elkartearen bonu bana jasoko dute, herriko saltokietan gastatzeko. Hiru dira sariak: 125 euroko bonoa lehenengoarentzako, 75 euroko bonua bigarrenarentzako eta 50 euroko bonua hirugarren geratzen denarentzako.
Antolatzaileek zehaztu dutenez, erabiltzaile bakoitzak argazki bakarra igo ahalko du, eta sare sozialik ez dutenek beste erabiltzaile baten bitartez igo dezakete euren argazkia, bere izena jarrita.
