Mugikortasun Planari lotutako azken lanak gauzatuko ditu Markina-Xemeingo Udalak
Taxien geltokia zehaztea eta margotzea falta zaie eta herriko beste puntu batzuetan marra horiak margotzea.
Mugikortasun Planari amaiera emango dio Markina-Xemeingo Udalak urtea amaitu orduko. Ekainaren hasieran hasi zen proiektu horren helburua herrigunean bizikletei eta oinezkoei lehentasuna eman, ibilgailuen abiadura murriztu eta segurtasuna eta iriste erraztasuna hobetzea izan da. Proiektuak bi fase nagusi izan ditu, eta bi fase horietan ezarritako jarduerez gain –bizikleten ibilbidea, seinale berriak …–, zenbait ekintza puntual ere eraman ditu aurrera udalak. “Jarduera puntualak ere sartu dira, hobekuntza esanguratsuak izan daitezkeela ikusi delako edo herritarren eskariak egin dituztelako”, azaldu du Luis Egurrola Arakistain Markina-Xemeingo alkateak.
Jarduera zehatz horietako batzuk Zelaiaren goiko parteko errepidean egin dituzte. Adokinak jarri dituzte errepidean, eta Bidarte Dorreko Parkearen aurrean zebrabidea lekuz aldatu eta hesi batzuk ere ezarri dituzte, segurtasuna bermatze aldera. “Proposamen bat jaso genuen esanez, hasieran jarritako zebrabidea zegoen tokia arriskutsua zela, umeek aringa-aringan irteten zutelako. Beraz, lekuz aldatzea erabaki genuen. Erdian jarri dugu Gaztelekura doazenentzako ere eskura egoteko, eta adokina jarri dugu errepidea bereizgarriago egin eta gidariak astiroago joan behar dutela ohartu daitezen”. Udaletxe ostean ere, igarobide bat ere markatu dute . “Berez, Laboral Kutxatik aurrera doan bidea oinezkoena da, baina udaletxetik Zelaibarri kalera seguruago gurutzatzeko zebrabide antzeko bat markatu dugu”.
Horregaz batera, Xemein Etorbidea eta Abesua beheko barreneko ordutegia aldatu dute. Barikuetan eta zapatuetan 17:00etatik 21:00etara itxiko dute errepidea ibilgailuentzat, domeketan, berriz, zabalik egongo da. Eremu horretan gainera, 20 kilometro orduko abiaduran joateko seinalea jarri dute errepidean.
Bestalde, Atxondoa Zeharkaletik San Jazintorantz edo errepide nagusira joateko Bekobenta eskolaren ondoan dagoen tuneleko ispilua ere aldatu dute eta material bereziko bat jarri dute, hautsiezina. Hipolita aurrean ere Iturraldeko parean dagoen moduko radar informatibo bat jarri dute. “Hori da herri erditik igarotzen den errepide nagusia eta Zelai, frontoi, biblioteka, Karmengo eliza eta osasun etxe inguru hori oinezko gehien ibiltzen den gunea era bada. Beraz, bi radar jarri ditugu, horien arteko tartea nondik nora doan zehaztuta geratzeko”.
Alkateak esan duenez, azken lan gutxi batzuk besterik ez dira falta.Taxien geltokia zehaztea eta margotzea falta zaie eta herriko beste puntu batzuetan marra horiak margotzea, baina ateri egotea behar dute horretarako. Falta diren lan guztiak urte amaierarako amaitzea dute helburu.
Lan horiek guztiak egiteko diru sailak onartzen joan dira apurka-apurka. Azaroaren 15eko osoko bilkuran onartu zuten 6.394,40 euroko azken kopurua.
