13/13 herri ekimenak mozioa aurkeztu du Lekeitioko Udalean
"13/13 sumarioa bezalako epaiketekin jarraitzea, eta epaiketa horren ondorioz espetxeratzeak eta zigor kondenak ematea oso larria dela" berresteko eskatzen dio 13/13 herri ekimenak Lekeitioko udalbatzari. Elkarretaratzea egingo da domekan [abenduaren 19] Lekeition, epaiketa salatzeko.
Eguenean [abenduak 16] Lekeitioko udalbatzarrak egingo duen osoko bilkuran aztertu eta bozkatuko dute 13/13 herri ekimenak 13/13 sumarioari buruz udaletxean aurkeztu duen mozioa. Sumario horretan inputatuta dagoen Arantza Zulueta herrian sustraituta dagoela eta, Lekeitioko udalbatzak mozioan jasotako adierazpena onartu eta horren berri ematea eskatzen dute.
Uztailaren 12an hasi zen zortzi euskal herritarren kontrako epaiketa Madrilgo Auzitegi Nazionalean, tartean Arantza Zulueta Lekeitioko bizilagunarena. Azaroaren 5ean amaitu ziren auzi saioak eta epaituak epaiaren zain daude orain. “Ia lau hilabete luze pasatu dira epaiketa hasi zenetik eta saio bakoitzean salatu egin dira urraketa guztiak, defentsarako eta epaiketa eskubidearen gutxieneko bermeak errespetatu ez direla argi utziz”, azaltzen dute mozioan. Azken hamaika urteak inputatuentzat “gogorrak” izan direla ere azpimarratzen dute. “Epaiketak ondorio pertsonal larriak ekarri dizkie, inputatuetariko bat, Juan Mari Jauregi, gaixotasun larri baten ondorioz hil egin da, prozesu guzti honek ziurrenik eragin zuzena izan duelarik”.
Hainbat erreakzio eragin ditu 13/13 auziaren epaiketak. Besteak beste, Lekeitioko udalbatzak eta EAJko, EH Bilduko eta Elkarrekin Podemos-IUko Eusko Legebiltzarreko talde parlamentarioek «estatuko sektore batzuek bultzatzen duten estrategia politiko-judiziala» salatu zuten epaiketa hastear zegoenean. Orduan egin zuten modura, eguenean aurkeztuko duten mozioan jasotako adierazpenaren bidez, “salbuespeneko legalitatearen aurka” daudela adierazi eta “13/13 sumarioa bezalako epaiketekin jarraitzea, eta epaiketa horren ondorioz espetxeratzeak eta zigor kondenak ematea oso larria dela” berrestea proposatzen dio 13/13 herri ekimenak Lekeitioko udalbatzari. Eta baita, “guztien artean bakean eta bizikidetzan oinarritutako etorkizuna eraikitzeko konpromisoa” berritu dezatela.
Horrez gain, herritarrei eta udalbatza osatzen duten zinegotziei 13/13 sumarioaren inguruko dinamiketan parte hartzeko gonbita egitea ere eskatzen zaie. Domekan [abenduak 19] bertan deitu du 13/13 herri ekimenak 13/13 epaiketa salatzeko elkarretaratzea. Udaletxeko eskaileratan 13:00etan jarri dute batzeko ordua.
