COVID ziurtagiria eremu itxi gehienetara zabaltzea baimendu du EAEko Auzitegi Nagusiak
Dekretua bihar [abenduak 15] sartuko da indarrean. Ostalaritzako eremuetara, zentro soziosanitarioetara, zahar etxeetara, gimnasioetara eta espetxeetara ere zabalduko da COVID ziurtagiriaren erabilera. Puntu batean bota du atzera: aire zabaleko kirol ekitaldietan, esate baterako, futbol zelaietan eta.
EAEko Auzitegi Nagusiak onartu egin du Eusko Jaurlaritzaren eskaera. Ondorioz, COVID ziurtagiriaren erabilera ostalaritzako eremuetara, zentro soziosanitarioetara, zahar etxeetara, kiroldegi eta gimnasioetara, eta espetxeetara ere zabaldu da, betiere azken hamalau egunetako intzidentzia tasa 300 kasutik gorakoa bada. Kirol instalazio irekiei-eta dagokiena, aldiz, atzera bota du. Dekretua bihar [abenduak 15] sartuko da indarrean.
Fiskaltzak atzo [abenduak 13] onartu zuen ziurtagiria eremu gehiagotara zabaltzea, eta kutsatzeak eragozteko bidean «beharrezko» erabakitzat jo zuen ziurtagiriaren hedapena. Erabaki «egokia eta proportzionala» dela adierazi zuen, eta argudiatu orain «osasun segurtasuna bermatzen eta horrelako establezimenduetan kutsatzeko arriskuak murrizten» jarri behar dela indarra.
Halaber, EAEko Auzitegi Nagusiak gogoratu du Espainiako Auzitegi Gorenak jurisprudentzia ezarri duela ziurtagiriaren erabilera baimenduta, eta, beraz, hark emandako irizpidea bete beharrekoa dela.
Auzitegiko epaileek puntu batean atzera bota dute Jaurlaritzaren eskaera: aire zabaleko kirol ekitaldietan. Autoan diotenez, Jaurlaritzak ez du behar beste justifikatu toki irekietan ziurtagiriaren beharra. Gainera, gogoratu dute kutsatzeko arriskurik handiena duten tokien artean ez daudela aire zabalean egindako ekitaldiak. Horrez gainera, epaileek azpimarratu dute ez dagoela ebazpen judizialik aire zabalean ziurtagiria erabiltzea baimentzen duenik, eta, hortaz, ez dagoela arrazoirik ziurtagiria halako tokietan zabaltzeko eskaerari oniritzia emateko.
