Martxan dago Markina-Xemeingo Aringa-Aringa Kirol Kluba
Taldean parte hartzeko gonbita egin du taldeak. Oraingoz 18 urtetik 60 urtera arteko 30 lagun bildu dira.
Markina-Xemeingo hainbat korrikalari elkartu eta Markina-Xemeingo Aringa-Aringa Kirol Kluba sortu dute. Herri lasterketak –kros, maratoi, maratoi erdi, 10 km, Behobia…– mendi lasterketak edo mendi trailetan ibiltzen diren aringa-aringalariek erabaki dute bakoitza bere kontura ibili beharrean, batera aritzea.
Antolatu duten lehenengo ekintza 2021eko Markina-Xemeingo San Silbestrea izan da eta, jakitera eman dutenez, urrian Zapola, Urregarai eta Bedartzandi inguruetan mendi lasterketa bat antolatzeko asmoa daukate.
Markina-Xemeingo Aringa-Aringa Kirol Klubeko kamiseta. Argazkia: Markina-Xemeingo Aringa-Aringa Kirol Kluba
Taldea irekita dagoela azpimarratu dute, eta horregatik sortu berri duten taldean parte hartzeko aukera eskaini nahi diete Markina-Xemein eta inguruko kirolariei. Taldekide izan nahi dutenek mxaringaringa@gmail.com helbidera idatzi dezakete taldekide izateko edo informazioa eskatzeko. “Momentuz, 18 urtetik 60 urtera arteko 30 lagun bildu gara, 18-25 urte bitarteko gazte mordoa tartean”. Otsailaren 11 da izena emateko azken eguna.
Taldekide izatearen abantailak ere zehaztu dituzte:
- Entrenatu eta lasterketetara elkarrekin joan. WhatsApp taldea daukate horretarako.
- Lagunarteko giro ezin hobe baten parte izan.
- Talde moduan, kolore berdinekin lasterketetan parte hartu. Hau da, Markina-Xemeingo taldean.
- Diru laguntzak lortuz gero, diru hori taldeko arropak ordaintzeko erabiliko dute, eta 2022rako badaukate jada laguntza bat.
Taldekide izateko baldintzak aringa-aringa egiteko gogoa edukitzea eta 30 euroko bazkide kuota ordaintzea dira.
