Baldintza gogorretan lehiatu zen V. Dzanga txapelketa
30 parte hartzaile izan zituen eta itsasoa nahiko nahastuta zegoen arren, pareta ona zeukaten olatuak egon ziren eta horrek txapelketa ikusgarri bat ahalbidetu zuen.
V. Dzanga Kayaksurf eta Waveski Txapelketa lehiatu zen zapatuan, Mendexako Karraspio hondartzan. Kayak surfeko eta Waveskiko Euskadiko XVI. Koparen barruan kokatzen den txapelketa baldintza gogorretan lehiatu zen, haize bolada handiak eta euri zaparradak. Antolakuntzatik aipatu dutenez, “ostarte zabalak lagun izan genituen, eta horrek ahalbidetu zuen txapelketa aurrera eramatea”. Waveskia eta kayak surfa lehiatu ziren eta bakoitzean kategoria ezberdinak.
Lehenik waveskia. Oraindik gure inguruan ez du indar handirik modalitate honek, baina adituek diotenez, “errendimendu handiena eskaintzen dute kayak surfean”. Lehian aritu zirenen artean, Masterretan Dani Perez izendatu zen irabazle, emakumezkoen OPEN kategorian, Ainhoa Tolosa, eta gizonezkoen OPEN kategorian, berriz, Odei Etxeberria.
Kayak surf luzeen kategoriari dagokionez, hau da, hiru metro edo gehiago dituztenak, Jose Piñeiro izendatu zen Masterretako txapeldun. Emakumeen OPEN kategorian, Olatz Garmendia nagusitu zen eta gizonezkoen OPEN kategorian, berriz, Hodei Crujeiras.
Kayak surf motzen kategorian, hau da, 2,70 metrorainokoak, Edu Etxeberriak lortu zuen irabazle izendatzea Masterretan. Grand Master kategorian, Jose Piñeirok, jada bigarren domina lortuz txapelketan. Eta, Gran Grand Master kategorian, berriz, Txema Carretok. OPEN kategorian, berriz, emakumeetan Xiang Messacasa nagusitu zen, eta gizonezkoen artean Odei Etxeberria. 23 urtez azpikoen kategorian, Aimar de La Fuente nagusitu zen.
Azkenik, junior kategoriak lehiatu ziren, hauetan, motzek eta luzeek batera parte hartu zuten. Emakumezkoen tandan, Xian Messacasak lortu zuen txapeldun izendatzea, bigarren domina eskuratuz. Eta gizonezkoen junior kategorian, Aiur Illarreta nagusitu zen.
Baldintza gogorretan egin zuten arren, burutu zen V.Dzanga txapelketa eta hori zen antolatzaileen helburua, “2021ean COVID-19ea dela eta, hainbat izan ziren bertan behera gelditu ziren jardunaldiak”, hortaz, 2022 urteari normaltasun bat emateko asmoz, aurrera eramateko erabaki hartu zuten, eta ez zen erabaki okerra izan.
