Munitibarko plazako haurren jolas parkeko berritze lanak amaitu dituzte
Martxoan hasi zituzten eraberritze obrak, eta herenegun bukatu. Diseinua modu parte hartzailean moldatu dute, adin denak asetzeko eta genero bereizketa leuntzeko asmoz.
Argazkia: Munitibarko Udala Iragan martxoaz geroztik, herriko enparantzan kokatuta dagoen umeentzako jolas parkea eraberritzeko obretan ibili dira Munitibarren. Behin berritze lan guztiak amaituta, herenegun zabaldu zuten jendartera parke hori.
Haurren jolas parkearen itxuraldatzea Zeuaz izeneko herri egitasmo kolektiboaren barruan egin du Munitibarko Udalak. Ekimen hori, hain zuzen, 2017tik dator, eta bertan herritarrek (batik bat, umeek nahiz gazteek) herriko azpiegituren zein baliabideen balorazioa egin dute. Zeuaz-en barruan, jolas parkearen berritzearen proiektua 2019an sortu zen, eta udalak, ondorioz, parkeari “probetxu handiagoa” ateratzeko prozesu parte hartzailea ipini zuen abian.
Parte hartzea, zutabe. Parkearen disenua zehazterakoan, hainbat belaunalditako ume eta gazteek jolas espazioa elkarbanatzea bilatu dute, eta generoaren auzia ere kontuan hartu dute; izan ere, ondorioztatu dute haurrak talde handietan biltzen direnean neska zein mutil batera ageri direla, baina, ostera, talde txikiagoen kasuan, genero arteko sakabanaketa ematen dela.
Parkeko jolas aparatuei dagokienez, jolas libreekin uztartzeko modukoak izatea eta, horregaz batera, adinean helduagoak direnentzat ere baliagarriak izatea bilatu dute, aniztasunarekiko hautua berretsiz. Udalaren eta Zeuaz egitasmoaren jomuga nagusiak, besteak beste, ondorengoak izan dira: baloreetan oinarritutako gunea sortzea; herritarren eta, batez ere, gazteenen elkarlana sustatzea; formazio parte hartzailea bultzatzea; diseinu kolektiboa eta elkar sorkuntzazkoa ahalbidetzea; eta haurrek hirigintzaz eta espazio publikoaz duten iritzia plazaratzea.
Proiektuaren aurrekontua 80.272 eurokoa izan da, eta Bizkaiko Foru Aldundiko azpiegituren sailak 26.903,14 euroko diru laguntza eman dio Munitibarko Udalari; udalak, horrenbestez, 53.368,86 euro baliatu ditu parkeko obrak egite aldera.
