'Loratu Mutriku' bonu kanpaina abian da
49 establezimenduk parte hartzen dute eta, ekainaren 13tik uztailaren 3ra iraungo du kanpainak.
IV. Loratu Mutriku bonu kanpaina martxan dago gaurtik [ekainak 13] aurrera. Kanpainaren helburua Mutrikuko merkataritza, ostalaritza eta zerbitzuetako aktibitatea indartzea eta herriko familien ekonomian laguntzea da.
Udalak 1.200 bonu finantzatuko ditu, hain zuzen ere, 18.000 euro bide erabilita. Bonu sorta bakoitza 50 eurokoa izango da eta banatuta egongo da; 10 euroko hiru zati eta 5 euroko lau zati. Bonuak 50 euroko balioa izango du, baina herritarrak 35 euro ordainduko ditu, gainontzeko 15 euroak udalak ordainduko dituelarik.
Bonuak erosi ahal izateko nahitaezkoa da Mutrikun erroldatuta egotea eta bakoitzak, gehienez, bonu sorta bat erosi dezake. Bonua, kanpainara atxikitutako establezimenduetan erabili ahalko da, eta behin erosita, ezingo dira itzuli.
Bonuak turismo bulegoan egongo dira eskuragarri, ekainaren 13tik aurrera, astelehenetik igandera 10:00etatik 14:00etara. Ostiral eta larunbatetan arratsaldez ere erosi ahal izango dira, 16:00etatik 18:00etara. Nortasun agiria erakustea ezinbestekoa izango da bonua eskuratzeko, hortaz, lagun edo familiako kideren bati bonuak erosteko kasuan, agiriaren kopia bat erakutsi beharko da.
Ordaintzeko lehentasunezko sistema banku txartela izango da, ezinezkoa den kasuetan bakarrik onartuko delarik esku-dirua. Erosketaren balioa bonuarena berdina edo gehiagokoa izan beharko da, hau da, bonuekin ordainduta ez da itzulketarik egingo esku-dirutan ezta bonu txikiagotan ere. Erosketaren balioa bonuaren kopurua baino handiagoa denean, falta dena diruz ordaindu beharko da.
Hauek dira bonu kanpainaren baitan dauden establezimenduak:
Adats Ileapaindegia · Alazne Optika · Albaro Denda · Alboka Okindegi eta Kafetegia · Aldana Burdindegia · Alday Klinika · Alkolea Edaritegia · Ametza Taberna · Ansorregi Oinetakoak · Apain Estetika Zentroa · Aparra Arropa Denda · Apartak Ileapaindegia · Arrizabalaga Harategia · Azkenetxe Ristorante · Bar Txoko · BareBare Taberna · Bigara Fruta Denda · Dilaitz Barne Diseinua · Dotore Ileapaindegia · Ekoamalur Ekodenda · Garaia Arropa Denda · Gotzon Arraindegia · Gotzone Ileak Ileapaindegia · Goxart Obradorea · Iparragirre Altzariak ·Iratxe Lorak· Iratxe Masajeak · Iripe Etxetresnak · Islada Fisioterapia · Ixasne Frutategia · Joseba Elezgara Masaje eta Osteopatia · Josune Ileapaindegia · Kalbaixo Jatetxea · Lasuen Elezgarai Botika · Lekube Burdindegia · Lon Apraiz Botika · Madariaga Paperdenda · Maider Pinto Estetika · Maneiro Lentzeria · Mila Frutategia · Olaizola Arropa Denda · Ostadar Fruta Denda · Panaderi Berri · Piper-en Txokoa Taberna · Potero Denda · Sabina Denda · Txalaparta Okindegi eta taberna · Tximak Ileapaindegia · Zuriñe Estetika
