Hirugarren Euskaraldiaren aurkezpena egin dute Markina-Xemeinen
Atzo [ekainak 22] plazaberripean hizkuntza ohiturak aldatzearen helburua berretsi zuten.
Edizio honen nondik-norakoak azaldu zituzten ekitaldian, baita interesa duenak zelan parte hartu dezakeen ere. Hasiera batean, Arkupean elkartzekoak baziren ere eguraldi txarrarengatik plazaberripean egin zuten aurkezpenean.
Markina-Xemeingo Udalak herriko taldeek gonbita luzatu zien, “elkarteen parte hartzea garrantzitsua izango delako Euskaraldia arrakastatsua izan dadin”. Maiatzaren 18tik elkarteek Arigune moduan izena emateko epea zabalik dute, norbanakoena irailaren 28an hasiko da. Jakinarazi dutenez, aurkezpenaren ondoren, hurrengo pausoa, batzordea martxan jartzea izango da.
Euskaraldiaren hirugarren edizioa azaroaren 18tik abenduaren 2ra egingo da. Beste behin, helburua izango da hizkuntza ohiturak aldatzea, egun horietan ahalik eta euskarazko hartu-eman gehien sorraraziz, eta aurrerantzean ere ohitura horiei eustea.
