Konpost Tea tailerra eskainiko dute Lekeition
Lekitto Bedarra taldeak antolatutako auzolan hileko azken tailerra izango da. Datorren eguenean [ekainak 30] emango dute ikastaroa.
Datorren asteko eguenean [ekainak 30], ongarri natural bat zelan egin ikasteko formakuntza saio bat eskainiko dute Lekeitioko Usotegi parkean: Konpost Tea tailerra. Lekitto Bedarra taldearen X. urteurrenaren harira antolatu duten auzolan hileko ekimenetako bat izango da hori ere.
Azaldu dutenez, azken ikastaroa izango da, eta beraz, parte hartzera animatu dute. “Era errez batean ongarri natural bat zelan egin ikasteko aukera eskainiko da. Zure landareek eskertuko dute”, adierazi dute.
Hain zuzen ere, ongarria zelan prestatu, noiz erabili eta zertarako irakatsiko dute besteak beste. Betiko modura, tailerra 17:00etan hasiko da.
Astero bat. Hainbat ikastaro antolatu ditu Lekitto Bedarrak ekainean: Tomate landaketa tailerra, mahats inausketa berdearena, Azeri buztanaren ingurukoa, meloi eta sandiaren landaketa, lekak ereiten ikastekoa eta piper txorizeroen landaketarena. Hurrengo erronka Urriko Usotegi Eguna antolatzea izango dela aurreratu dute.
