LGTBI eskubideen defentsa harrotasunez egin du Lekeitiok
Barikuan eta zapatuan [ekainak 24-25] Ortzadar LGTB Elkarteak hainbat ekintza antolatu zituen.
Bihar [ekainak 28] nazioarteko LGTBI+ Harrotasunaren Eguna da, baina Lekeition aurretik hasi dira ospatzen. Udalak bat egin zuen Ortzadar LGBT Elkarteak antolatzen duen Bilbo Bizkaia Harro egitarauagaz hainbat ekintza egin ziren barikuan eta zapatuan [ekainak 24-25], plazan.
Barikuan egin zuten arduradunek pregoia. Ortzadar LGBT Elkarteak zortzi urte daramatza Bilbo Bizkaia Harro ekimena antolatzen, baina aurtengo izan da lehen aldia Bizkaia osora zabaldu dituztenak ekintzak. “Gero eta indartsuagoak gara, erreferentzia bihurtu gara, ez bakarrik gure lurraldean, baita ingurukoetan ere”, esan zuten pregoian. Ez zuten laguntzaileei eskerrak emateko aukera galdu eta jai giroan parte hartzeko deia luzatu. Hala ere, aldarrikapenerako azken mezua utzi zuten: “Denok batera egin behar dugu lan, funtsezkoa da. Behin eta berriro esango dugu, ez dugu inoiz borrokatzen utziko, dantzatzen jarraituko dugu, denen gainetik”.
Asteburuan ikuskizunak izan ziren batez ere protagonistak. Egitarauari hasiera emateko zenbait film labur eskaini zituzten. Barikuan [ekainak 24] Yogurinha Borovak herriko plaza dantzaz eta musikaz bete zuen eta zapatuan [ekainak 25] Kai Nakairen txanda izan zen. Egunari amaiera emateko DJak egon ziren bi egunetan.
