'Metatron. El camino a la sabiduria cosmica' Arantza Ibarraren liburu berria
Madrileko Azokan aurkeztu du energia erdigunean jartzen duen bere bigarren liburua.
Arantza Ibarra sortzaile ondarrutarrak Metatron. El camino a la sabiduria cosmica liburua argitaratu du, Kolima Argitaletxearekin. Lehenengo liburuari jarraituz, energia eta hazkunde pertsonala jartzen ditu erdigunean.
Año 2020. El arcangel Metatron y otros seres de luz liburua argitaratu zuen duela bi urte, lehenengo aldiz bere bizipenetan oinarrituta lehen pertsonan idatzitako liburua, aurretik egindako lanen aritik urrundu, eta bere hastapenak eta esnatze prozesua azalduz. Orain, bigarren zatia ez den arren, lehenengo liburua oinarri hartuta jarraipen bat izan daitekeen lana argitaratu du, Kolima argitaletxearekin. Ibarraren esanetan: “Ez da lehenengoaren jarraipen bat, indibidualki irakurri daitezke, gauza ezberdinak lantzen baitira, baina biak irakurtzeak beti ere sakontasun gehiagoz hausnartzeko bide ematen du”.
Izurdeak, energia ulertzeko bide
Liburu berrian unibertsoko energiak aztertzen ditu, eta energia nola erabili lurrean gertatzen diren gauzak ulertzeko, eta horretarako unibertsoan dauden izaki ezberdinei erreparatzen dio.
Liburuaren azalean izurdeak agertzen dira, bereziki garrantzitsuak baitira autorearen esanetan “izurdeen hizkuntza ulergaitza da guretzat, eta gizakiak baino adimen gaitasun handiagoa dute. Bibrazioekin mugitzen dira, eta beraien presentzia oso garrantzitsua da lurrean energiak lantzeko”. Izurdeen hizkuntza unibertsoari lotuta dago, gizakiak baino askoz ere lotuago daude energiari.
Irakurleari opari bat eskaintzeko asmoagaz idatzi du Ibarrak liburua, itxaropena edota mundua ikusteko beste ikuspuntu bat eskainiz: “Beldurrak mugitzen gaitu eta askatu egin behar gara, maitasuna erdigunean jarri eta bide erabili. Elkarlaguntzan oinarritu, eta konturatu uste baino lotuago gaudela gure artean”.
Madrileko azoka
Ekainaren erdialdean izandako Madrileko Azokan aurkeztu zuen bere bigarren liburua, eta pozik agertu da ondarrutarra izandako harrerarekin. “Azoka handia da eta nire liburua ez da irakurle guztientzat, ez da fikzioa irakurtzea bezala, gai oso konkretua da, irekita egon behar zara liburua irakurtzeko, edo behintzat kuriositate kutsu bat izan”. Madrilen uste baino jende gehiagok erosi du liburua, eta interesa piztu duela sumatu du.
