'Alain,Txapeldun!' kanpainari babesa adierazteko argazki erraldoia atera dute Aulestin
Uztailaren 9ko festan parte hartzeko deia egin dute. Laguntzarako bonuak salgai daude oraindik, eta eskualdeko herri denetan dago erosteko aukera.
Lagun talde handi bat elkartu zen Aulestiko sanjoanetako Paella Egunean Aulestiko Urzabal guraso elkarteak abiarazitako Alain, Txapeldun! kanpainari babesa adierazteko. Guztiek batera argazki erraldoia atera zuten frontoian, Alain Kortabitarte udalerriko umeak daukan Menke-Hennekam sindromea bistaratzea eta hura ikertzeko funtsak lortzea helburu duen egitasmoari laguntzeko.
Alain txapeldun! kanpainari babesa erakusteko ateratako argazki erradoia. Argazkia: June Prieto
Maiatzaren 30ean eman zuen Aulestiko guraso elkarteak kanpainaren berri. Alde batetik, Kortabitarteri laguntzeko 10 euroko bonu laguntzak saltzen ari dira, eta bestetik, jasotako laguntza zer edo zelan itzultzeko, Urzabal guraso elkarteak jaialdi bat antolatuko du uztailaren 9an, Santa Eufemiko zelaian.
Antolatzaileek gogora ekarri dutenez, jaialdian parte hartu nahi dutenek izena eman behar dute aldez aurretik, eta izen ematea bonu laguntzetako eta karteleko QR kodearen bidez eman beharko da. Zapolako trintxeretara eta bunkerretara egingo den bisita animatuko kopurua mugatua dela ere ohartarazi dute.
Esan dutenez, izen ematea “beharrezkoa” dute “jaiaren antolaketarako aurreikuspenak” egin ahal izateko, tabernakoa besteak beste. Izan ere, egun osoan taberna zabalik egongo da, musikagaz girotuta. Gainera, ogitartekoak eta edariak ere egongo dira salgai.
Laguntza bonuak. Oraindik laguntza bonuak geratzen dira, eta horiek erostera animatu dute. Eskualdeko herri guztietan dago erosteko aukera: Aulestin, Ilunzar tabernan, Ubilla Aterpetxean eta Ainhoa janari dendan daude salgai; Amoroton, Epermendin; Lekeition, Elu burdindegian, Araldeberrin eta Galarrena herriko tabernan; Munitibarren, Ondamendin eta Sindikatun; Ispasterren, herriko tabernan; Ziortza-Bolibarren, Kanpapen; Markina-Xemeinen, Txispitan eta Kareagan; Gizaburuagan, herriko tabernan; Berriatuan, Zentralean; Etxebarrian, Antsotegi hotelean; Mendexan, Mahai gainekoan eta Ondarroan, Zurrumurru liburu dendan eta Sustrai belar dendan. Laguntzeko bonuak erostearen truke, Urzabal guraso elkarteak biserak banatuko ditu.
Bonu laguntzez gain, nahi duenak ekarpen pertsonala egin ahal izateko, kontu zenbakia ere badaukate:
ES63 3035 0008 71 0080043298 (Laboral Kutxa).
