Itsasoan galdutako mutrikuarrak gogoan
San Pedro Jaietako egitarauaren lehenengo ekimena burutu da gaur [ekainak 29], 12:00etan, Moila Zaharrean.
Azken bi urteetan bertan behera geratu ostean, asko izan dira Moila Zaharrera hurbildu diren herritarrak, eta 12:00etan hasiera eman diote omenaldiari, “horrelako gauzak ezin dira ahaztu” esanez.
Txistularien doinuagaz, arrantzale jantzitako bi neskek eskanitako dantzarekin gozotu dute hurbildu direnen eguerdia. Ondoren Mutrikuko Udalaren izenean adierazpenak egin dituzte, herriaren nortasuna arrantza izan den Mutrikuko herria erdigunean jarriz: “Itsasoari lotuta bizi izan dira Mutrikuko familiak, aberastasuna eta onura ekarri zituen itsasoak, gizon zein emakumeen lana ekarriz. Baina dena ez zen ederra izan, itsasoaren alderdi ilunena ere bizi izan dugu, eta ez dugu ahaztuko”.
300 izan dira itsasoan desagertutako mutrikuarrak, “bakoitza historia batekin, familia batekin, baina gauza amankomun bat izanik, mutrikuarrak zirela”. Horregatik, desagertutakoak gogoan izateko eta familia zein ondorengoei babesa emateko asmoz egiten da, eta egingo da, omenaldia. Hori esanik, Mikel Laboaren Txoria txori abestu dute omenaldian zeuden guztiek, txistulari eta gitarra jolearen laguntzagaz, eta ondoren emozioz beterik, krabelin gorri bana jaurti dute uretara.
