Zapato Azulean izandako erasoak salatu dituzte
Radixu Irratiak, Ondarroako Ernaik eta Ondarroako Udalak adierazpenak egin dituzte zapatuan izandako erasoak salatzeko.
Ekainaren 25ean Ondarroako Zapato Azule jaiaren baitan emandako eraso matxista eta homofoboak salatu dituzte herriko hainbat talde eta instituzioek, gertakarien larritasuna azpimarratu eta salatzeko asmoarekin.
Radixu Irratiak, jaiaren antolatzaile izanik, guztiz gaitzetsi du gertatukoa: “Gure espazioetan eta gure jaietan ez dugu inoiz onartu, eta ez dugu inoiz onartuko jarrera matxista eta erasokorrik”.
Bestalde, Ondarroako Ernaik txosna gunearen kudeatzaile izanik, bertan emandako eraso sexista eta homofoboak salatu ditu: “Hiru eraso zenbatu genituen; bi eraso sexista eta eraso homofobo bat”. Gainera, erasoen larritasuna ikusirik, kasu guztietan protokolo feminista aktibatu zutela aipatu dute, eta erasotzaileak kanporatuak izan zirela. Ernaik argi adierazi du gertakariek larritasuna azpimarratu eta salatzearekin batera, borrokan jarraituko dutela.
Azkenik, Ondarroako Udalak lau eraso matxista jakinarazi zirela adierazi du, eta guztietan behar bezala jarraitu zela aurretiaz landutako protokoloa. Lau eraso horietatik hiru txosna gunean izan ziren, eta Ernaiko arduradunek txosna gunean gertatutako erasoak bideratzeko izandako jarrera azpimarratu dute. Gaineratu dutenez, “erasoetako batek Udaltzainen esku hartzea eskatu zuen, eta baita ere Ertzaintzarena, egoera geroz eta okerragoa zelako”. Zapato Azuleko eraso matxistei aurre egiteko telefonoan ere eraso bat jasan zuen emakume batek deitu zuen, eta kasu horretan ere, beharrezko laguntza eta asistentzia eskaini zitzaizkion erasotutako emakumeari.
Azkenik, Ondarroako Udalak, Radixu Irratiak, eta herriko beste eragileek argi utzi dute Zapato Azule jaia zein Ondarroako herria eraso matxistarik gabeko espazio izateko lanean jarraituko dutela, gune aske eta seguruak izan daitezen.
