Ume eta gazteek Duatloi Txikia egingo dute Markina-Xemeinen
Markina-Xemeingo XII. Duatloi Txikia uztailaren 9an izango da, eta izen emateko epea uztailaren 6ra artekoa da. Adin tartearen arabera zehaztutako bost kategoria izango dira.
Argazkia: Alarabi Triatloi Taldea. Markina-Xemeinek XII. Duatloi Txikia hartuko du datorren zapatuan, uztailaren 9an. Haurrek eta gaztetxoek tarte on bat pasatzeko eta, era berean, kirolaz gozatzeko aukera paregabea izango dute, 11:00etatik aurrera, Zelaian. Alarabi Triatloi Taldeak eta Markina-Xemeingo Udalak elkarlanean antolatutako ekimena izango da, eta hainbat kategoriatako duatletak bilduko ditu.
Herri barruko ibilbidea osatu beharko dute parte hartzaileek. Korrikaldia Zelaiaren inguruan egingo dute eta txirrindularitzako sektorea, ostera, inguruko kaleetan barrena. Parte hartu gure dutenek doako izen ematea izango dute, baina hurrengo eguaztena, uztailaren 6a, baino lehen egin beharko dute. Horretarako, alarabi.triatloi@gmail.com helbide elektronikora mezua idatzi beharko dute; mezu horretan, parte hartzailearen izen-abizenak, jaiotze data eta udalerria ipini beharko dituzte.
Bost proba. Adin tartea aintzat izanda, antolakuntzak bost kategoria banatu ditu zapaturako. LH1 eta LH2 mailetakoek, 2014. eta 2015. urteetan jaiotakoek, 250 metro egingo dituzte arineketan, 325 metro bizikletan eta beste 250 metro korrika. 2012-2013 artekoak, LH3 eta LH4koak, 325 metroko ibilbideagaz hasiko dira, bizikletan 650 egiteko eta, ondoren, beste 250 korrika.
LH5 eta 6koek, 2010-2011 artean jaiotakoek, ostera, 325 metroko korrikaldia egingo dute probaren hasieran eta amaieran; tartean, 800 metroko txirrindularitza trantsizioa. DBH1 eta 2ko ikasleek, 2008-2009 artekoek, 500 metroko korrika saioa eta 1.600eko txirrindularitza sektorea izango dute. Azkenik, DBH 3eta 4. mailakoek, 2006-2007 bitartekoek, 650 metro izango dituzte korrika hasieran; ondoren, 2.400 bizikletaz; amaitzeko, aldiz, 500 metro, berriz ere, korrika.
