Gure Zirkua Ispasterrera heldu da
Gure Zirkua Ispasterren egongo da asteburu honetan eta hurrengoan. Basokoetxe inguruan egongo da zirkua; sarrerak internetez eros daitezke, 13 euroren truke.
Gure Zirkuak, herriz herriko biraren barruan, geldialdia egingo du Ispasterren, adin guztietarako eta euskarazko zirku ikuskizuna eskaintzeko. Horrenbestez, Ispasterko Udalak kulturaren eta euskararen aldeko hautuagaz aurrera darrai, eta puri-purian dagoen euskal zirkua hartuko du datorren asteburuan eta baita hurrengoan ere. Zirkua herriaren sarreran kokatuta dagoen Basokoetxe industriagune inguruan egongo da. Herrigunetik oso hurre dago eremu hori, oinez bertaratzeko moduan, baina aparkalekua ere badu.
Barikuan hasiko da Gure Zirkuaren lehendabiziko pasea, 19:00etan. Zapatuan, ostera, pase bikoitza egingo dute: lehendabizikoa 12:00etan izango da eta bigarrena, berriz, 19:00etan; domekan ere pase biko formatuari eutsiko diote. Hurrengo asteburuari dagokionez, molde bera izango dute paseek: barikuko saio bakarra eta zapatuko biak. Dena dela, beharrezkoa dela ikusiz gero, domekan beste pase bat egitea planteatzen ari dira zirkuko eta udaleko antolatzaileak. Gure Zirkuaren ikuskizuna ikustera joateko sarrerak internet bitartez eros daitezke, 13 euroren truke.
Urtebete beranduago. Ispasterko Udaleko Kultura zinegotziak, Eskarne Gogenolak, adierazi duenaren arabera, Gure Zirkua Ispasterrera eroateko helburua iaztik dator, baina, zenbait arazo tarteko, orain arte ezinezkoa izan da egitea: “Iaz ipini ginen hartu-emanetan eurekin, baina biran bete-betean sartuta zeuden eta, ondorioz, ez zeukaten data librerik geurera etorri ahal izateko”.
Duela hilabete bi, baina, zirkukoak udalagaz harremanetan ipini ziren: “Beraien biraren barruan, inguruko herrietatik zetozela komentatu ziguten, Gipuzkoako bidean zeudelako; beraz, Ispasterren geldialditxo bat egitea proposatu ziguten, eta guk gustora onartu genuen proposamena”. Gogenolak “ikusteko gauza ederra” izango dela uste du: “Pentsatzen dut inguruko udalerrietakoak ere ispasterrera hurreratuko direla, boladan dagoen ikuskizuna delako eta, oro har, tarte atsegina pasatzeko aukera ematen duelako”.
