Bilboko Euskal Museoaren erakusketa ibiltaria Ondarroara ailegatuko da
Erakusketaren inaugurazioa eguenean [irailak 1] izango da, 12:30ean, Itsasaurren. Hilabete osoan egongo da ikusgai herrian.
Bilboko Euskal Museoak bere berrikuntza integrala erakusteko helburuz Euskal kulturaren nazioarteko atea erakusketa ibiltaria abiatu zuen maiatzean. Armintza, Mundaka eta Bakion udalerriak igaro osean, irailaren 1ean ailegatuko da Ondarroara, eta hilabete osoan egongo da ikusgai.
Kanpoko espazioetan erakusteko sortutako erakusketa hogei panelek osatzen dute, eta etorkizuneko Euskal Museoaren informazio arkitektonikoa eta museografikoa jasotzen dute. Piezak Asier Gomez argazkilariak egin ditu, museoko bilduma eta erakusketetako teknikariek osatutako testuen laguntzagaz (euskaraz, gaztelaniaz, frantsesez eta ingelesez).
Proiektu berria. Erakusketaren helburua da bertoko jendeak Euskal Museoaren proiektua eta bilduma ezagutzea, eta lurraldeko udalerrietan dabiltzan turistek hurbiletik ikusi ahal izatea euskal kulturaren erreferentea izango den gune bat.
Bisitariek ikusgai izango dituzten hogei piezen bitartez Euskal Museo berria nolakoa izango den irudikatuko dute, egingo den berrikuntza integraleko prozesuaren ondoren. Alde batetik, alderdi arkitektonikoa erakutsiko baita, infografia eta informazio teknikoa oinarri hartuta. Kanpotik, jatorrizko bolumetriak eta estalkiekiko lotura berreskuratu nahi dira. Barrualdean, zenbait espazio nabarmenduko dira, hala nola Miserikordia, hustutako bolumen handia, erakusketa-lengoaia berriekin eta puntako baliabideekin.
Horrez gain, Euskal Museoaren etorkizuneko museografia berriaren zati bat erakutsiko du, bilduma osatzen duten funtsen aniztasuna eta aberastasuna erakusteko nahiagaz. Horretarako, garai, testuinguru eta esparru sozial desberdinak islatzen dituzten piezak aukeratu dira, artzaintza-kulturatik hasi eta industrializazioaren ondoriozko burgesiaren piezak ere barne hartuta.
