Solabarrieta eta Badiola omenduko dituzte Egia-Iriondo memorialean
Zapatuan [abenduak 10] lehiatuko den Egia-Iriondo memorialean egingo zaie aitortza munduko txapeldunei.
Ager Solabarrieta eta Maite Badiola ondarrutarrak tiro jaurtiketako munduko txapeldunak omenduko dituzte zapatuan [abenduak 10] Ondarroan lehiatuko den Egia-Iriondo memorialaren amaieran, “herritar guztiok batera omentzeko momentua izanik”. Lasterketa antolatzeaz arduratzen den udal kirol sailak hartu du erabakia: “Omenaldi bat egin nahi genien, eta zer hobeto hainbeste herritar batzen dituen herriko kirol ekitaldi bat baino”.
Muduko Txapelketa Al Ain herrian (Arabiar Emirerri Batuak) lehiatu zen duela aste batzuk, eta etzandako modalitatean nagusitu ziren ondarrutarrak. Hortaz, lasterketaren amaieran egiten den sari banaketaren baitan egingo zaie aitortza txapeldunei. “Egia-Iriondo memorialaren amaierako sari banaketa ekitaldia leku polita da Agerrek eta Maitek merezi duten omenaldia eskaintzeko”, esan du Nagore Badiola Alberdi kirol zinegotziak. “Ze politago omenaldi hau denok batera kirol giroan egitea baino, eta zer hoberik herriko kirolaren eta kirolarien bilgunea den Egia-Iriondo memoriala baino”.
