Euskal Kostaldeko Geoparkeak bisitarien balorazio "oso positiboa" jaso du
Aste Santuetan ibili den bisitari kopurua handia izan da, eta jasotako balorazioaren bataz bestekoa 9,2koa izan da.
Euskal Kostaldeko Geoparkeak azken jai egun hauetan bisitari kopuru handia jaso duela jakinarazi du Geoparkeak, eta bisitarien aldetik jasotako balorazioa “oso positiboa” izan dela adierazi dute. Antolatu diren bisita eta irteera gidatuek oso balorazio ona izan dute (9,2)
Mutriku, Deba eta Zumaiaren kasuan, turismo bulegoetara jo duten bisitarien kopurua eta antolatutako bisita gidatu zein irteeretako datuei erreparatuta, bisitari kopuru handia jaso da. “Eguraldia lagun, Aste Santuan bisitari andana izan da Euskal Kostaldearen Geoparkeaz gozatzen”. Zehaztu dutenez, Aste Santuko lehen hiru egunetan erakarri zuen jende gehien Geoparkeak, hau da, apirilaren 6tik 8ra.
“Publiko zabalari eskainitako jarduera erakargarriak eskaini ditu Geoparkeak aurten ere, Deba, Mutriku eta Zumaiako ondare kulturala, naturala eta geologikoa ezagutzera emateko, eta, horri esker, ehunka lagunek gertutik ezagutu dute lurraldearen aniztasuna”. Datu aipagarritzat zehaztu dute bisita gidatuetan parte hartu dutenen jatorria, hala nola, gipuzkoarren kopuruak nabarmen egin duela gora: “Euskal Herriko bisitarien artean gehiengoa osatu dute, nafarrekin eta bizkaitarrekin batera”. Bestalde Espainiako estatutik jasotako bisiten artean, Kataluniatik eta Madrildik etorritakoak izan dira ugarienak. Hala ere, Aragoi, Valentzia eta Gaztela Leonetik ere bidaiari asko gerturatu da.
Gainera, online bidezko erreserba lehenengo aukera bilakatu da, “azken urteetako tendentziarekin jarraituz”. Horri esker, bisitaren ondoren jasotzen duten inkestetan jasotako datuen, bisitei buruzko balorazioak eskaintzen dizkiete, bataz bestekoa, 9,2koa izan da. Balorazio onenak lortu dituzten atalak jasotako tratua (9,5 eta 10eko puntuazioa), eta giden azalpenak izan dira (9 eta 10 puntuko balorazioa).
