52 txirrindulari elkartu dira Berriatuko BTT martxan
Antolatzaileek 24. ekitaldiaren balorazio "positiboa" egin dute.
Argazkia: Urepel Kirol taldea. Berriatuko 24. BTT Martxa egin zuten iragan zapatuan [maiatzak 14], euripean baina giro ederrean. Udalak eta Urepel Kirol Taldeak antolatuta, 52 txirrindularik parte hartu zuten, eta antolakuntza lantaldeko kideak kopuru horregaz zein bizitako egunagaz “asebeteta” azaldu dira. Izen ematea 08:30ean zabaldu zuten herriko plazan, eta uneoro zerura begira egon ziren: “Jakin bagenekien agindutako eguraldi eskasak hasieran parte hartzeko asmoa zuten asko eta asko kikildu egingo zituela, baina azkenean lagun talde ederra elkartu ginen”.
Eguzkipean hartu zuten irteera parte hartzaileek, baina, denborak eurrera egin ahala, euria eta aro txarra nabarmendu ziren. Ibilbideek (bai luzeak, bai laburrak), ostera, ez zuten aldaketarik jasan: “Egia da lokatza egon bazegoela, baina ura izan zen nagusi. Edozelan ere, ibilbide biak bere horretan mantendu genituen, eta ziklistek gogotik disfrutatu zuten”. Era berean, antolatzaileek ez zuten arazo handirik izan, urak bizikleta gainean suposatu ohi duen arriskua gorabehera. “Matxuraren eta erorikoren bat edo beste egon zen, baina ezer larririk ez; alde horretatik, dena espero legez joan zen”, adierazi dute.
Helmuga eremuan, jan-edanagaz eta lagunarteko aldarteaz gozatzeko aukera eduki zuten txirrindulariek eta bertaratutako guztiek. Horrez gain, antolakuntzak eskuragarri ipinitako dutxa zerbitzua “guztiz arrakastatsua” izan zela argitu dute: “Garbituta eta epeletan sartuta, parte hartzaileek beste itxura batez gozatu ahal izan zuten txorizo ogitartekoaz eta merezitako garagardoaz”.
Aurten parte hartutakoek errepikatzea eta jende berria erakartzea bilatuko dute datorren urtean
Mantentzea, helburu. Datorren urtera begira, ohiko formatuari eta dinamikei eustea daukatu buruan Urepel KTko kideek: “Geure txikitasunean eta umiltasunean, jendea erakarriko duen mendi martxa egiten saiatuko gara berriro; ea hurrengo urtean eguraldiak zertxobait gehiago errespetatzen gaituen. Aurten, herriko eta Lea-Artibai ingurukoez gain, Busturialdeko ziklistak ere hurreratu dira, baita Gipuzkoatik etorritakoak ere; beraz, hurrengo urtean beraiek errepikatzea eta jende berria erakartzea bilatuko dugu, ilusio handiz antolatzen dugun martxa baita hau”.
