Martxan dago 'Mutriku goitik behera' tribiala
Lehenengo partidan jokatzeko aukera zabalik dago, eta maiatzaren 25a izango da parte hartzeko azkenengo eguna.
Jolastuz Mutriku sakonago ezagutzeko aukera dago Mutriku goitik behera tribialaren bidez, lotura honetan. 1.000 galdera baino gehiago ditu, eta bakarka nahiz taldean jokatzeko aukera eskaintzen du.
Duela urte bete Mutriku BHIk egindako Mutrikuar peto petoa tribiala eta herriko hezkuntza batzordearen herri curriculuma lantzeko ideia uztartuta jaio zen Mutriku goitik behera proiektua. Herriko 40 talde eta eragile inguruk parte hartu dute, Mutrikuko Udalarekin batera elkarlanean.
Lau kategoriatan banatu dituzte galderak: euskarak bustitako lurra, historia eta istorioak, herri naturazalea eta kirolzalea eta herri bizia. Galdera guztiek dute herriarekin zerikusia, “helburua hasieratik Mutriku gehiago ezagutzea eta berari buruzko ondarea biltzea izan baita”.
Lehenengo partidan jokatzeko aukera dago jada, eta maiatzaren 25a izango da parte hartzeko azkenengo eguna. “Galderak ondoen eta azkarren erantzuten dituztenekin sailkapena osatuko da, eta partida amaitzen den azken egunean lehen postuan dagoena izango da txapelduna”. Irabazleari Mutrikuko mahai jokoaren ale bat oparituko diote sari gisa, eta beste bat banatuko dute parte hartzaile guztien arteko zozketa bitartez. Aurreratu dutenez, gaur gaurkoz, mahai jokoaren aleak herriko toki esanguratsuetan soilik banatuko dira, baina udazkenetik aurrera herritarrek eskuratzeko aukera izango dute.
