Mutriku Sokatira Taldea, hirugarren Berriatuan
Gaztedi A gailendu da 680 kiloko proban. Pisu horretako finala zapatuan [maiatzak 20] lehiatuko dute, Deban.
Argazkia: Mutriku Sokatira Taldea. Mutriku Sokatira Taldeak maila handian ipini du abian Euskadiko lur gaineko sokatira txapelketa. 680 kiloko lehia Berriatuan hasi zuten iragan domekan [maiatzak 14], eta hirugarren postuan amaitu zuten. Bost talde aritu ziren nor baino nor gehiago: Mutriku ST, Akelarre, Gaztedi A, Gaztedi B eta Goiherri.
Txanda bitara lehiatu zuten, eta bien baturagaz punturik gehien poltsikoratu zuena suertatu zen garaile. Hautagai nagusiak, Gaztedi Ak, ez zuen hutsik egin, eta garaipen sendoa eskuratu zuen; Goiherri sailkatu zen bigarren, eta hirugarren postuan Akelarreren eta mutrikuarren arteko berdinketa egon zen; sailkapena Gaztedi Bk osatu zuen.
Mutriku STko lantaldea emaitzagaz “asebeteta” agertu da, “maila oso txukuna” erakutsi zutelako: “Lehen tirakadan, Goiherri moduko talde sendo bati ezustekoa eman genion, ederto aritu ginen. Maila horretako talde baten inguruan aritzea gauza polita da”. 680 kiloko finala asteburu honetan lehiatuko dute, Deban; zapatuan [maiatzak 20] izango da, 18:00etan.
Egokitzapen lanak. Proba horri begira, taldea “osatu” egin behar dutela aurreratu dute: “23 urtez azpiko zenbait partaide ditugu, eta taldekideak beraien artean ahal bezain hoberen moldatzen saiatu behar dira; adibidez, Berriatuko bigarren tirakadan zenbait aldaketa egin genituen, eta sartu ziren ordezko horiek ere taldearen batasunera moldatzeko egokitzapen lanak egin behar dituzte”.
