Gorabideko langileek greban daude, negoziazioen blokeoa ikusita
Aste osoko greba deitu dute, eta negoziazioak aurrera egin ezean, greba mugagabea egitea baloratuko dute.
Gorabideren Ondarroako egoitzaren aurrean langileek egindako salaketa. Gorabideko langileek greban jarraitzen dute. Asteon bost egunetako grebari ekin diote, astelehenean [ekainak 12] hasi ziren eta barikura [ekainak 16] arte izango dela zehaztu dute. Hala ere, ez dute baztertzen greba mugagabea abiatzea, adierazi dutenez, enpresak eta Bizkaiko Foru Aldundiak negoziazioen aurrean “borondate eza” erakutsi baitute.
ELA, LAB eta ESK sindikatuek blokeo egoera honen “errudunak” direla salatu dute: “Foru erakundeak blokeoa mantenduz erakutsitako arduragabekeria oso larria da, eta beraien ardurapeko zerbitzu publikoen kalitatea gutxi axola zaiela erakusten du”.
Zehaztu dutenez Txema Franco Gorabideko gerenteari duela hogei egun baino gehiago helarazi zioten proposamen bat, negoziazioa desblokeatzeko asmoz, baina enpresako zuzendaritzak “ez du erantzun, eta ez da batzordearekin bildu”.
Egoerari irtenbidea emateko modua erosahalmena berreskuratzea bermatuko duen hitzarmena sinatzea dela zehaztu dute sindikatuek; 2023ko urtarrilaren 1ean langileek % 13,49ko erosahalmena galduta zuten soldatetan. Aldarrikatu dutenez egutegirik gabeko behin behineko kontratuak ezabatzea eskatzen dute, “langileen heren bati erdi-esklabotza ezartzen diotenak”. Baita kontzilizaio neurriak hartzea ere, balditzak “hobetzeko”, sektorearen gehiengoa emakumezkoak direla azpimarratuz.
Deitutako bost greba egunetarako manifestazioak antolatu dituzte, gaur [ekainak 14] interpelazioa aurkeztuko dute Bizkaiko Batzar Nagusien egoitzan, Bilbon. Bihar [ekainak 15] eta etzi [ekainak 16], berriz, kanpaldia eta mobilizazio jarraitua egingo dute Gorabide enpresaren egoitzaren aurrean, Bizkaia plazan.
Asteon egingo duten mobilizazioen ostean, negoziaziorik egon ezean, grebarekin jarraitzea aurreikusten dute: “Gorabideko Zuzendaritzaren eta Bizkaiko Foru Aldundiaren arduragabekeriak jarraitzen badu, batzordeak ez du baztertzen bere borrokan urrats irmoagoak ematea, eta greba mugagabea deitzea baloratuko du”.
